Таълим вазирлиги самарқанд иқтисодиёт ва сервис институти

12.2. Маъмурий ислоҳотларни амалга ошириш йўналишлари
Маъмурий ислоҳотлар тадбиқ этилаётган йўналишлар турлича. Улардан энг кўп кулланиладиганларини кўриб чиқамиз.
Хусусийлаштириш. Кенг маънода бу ҳукумат ролини қисқартиришга, демакки, бошқарувда ёки мулкка эгалик масаласида ҳусусий сектор моҳиятини оширишга қаратилган ҳаракатдир. Хусусийлаштириш нафақат давлат мулкини ҳусусий мулкка айлантирилишни, балки маълум шароитларда аниқ хизматларни кўрсатиш, фуқароларга хизматларни танлаш имкониятини яратиш ва бошқа шу каби масалалар юзасидан ҳусусий ташкилотлар билан шартномалар имзолашни ҳам англатади.
Давлат бошқарувини шакллантириш. Бу икки кўринишда амалга оширилади. Биринчиси, марказлашган ҳокимиятни сақлаб қолган ҳолда алоҳида ваколатларни бошқарувнинг қуйи органларига олиб беришдан иборат бўлса, иккинчиси эса ўз зиммаларига юкланган вазифаларни бажариш учун шахсий ресурсларига эга бўлган мухтор таркибларни (коммуна, муниципалитет, жамоат бирлашмаларини) ташкил этишни талаб қилади. Натижада аҳолига хизмат кўрсатиш учун керакли бўлган шароитларни яхшилаш ва қабул қилинган қарорларнинг самарадорлигини оширишни таъминлайди. Шакллантиришнинг бевосита талаблари молиявий мустақиллик ва минтақавий, ҳамда жойлардаги ҳукумат органлари мажбуриятларидан иборатдир.
Давлат хизматлари сифатини ва уларни тақсимлаш механизмини яхшилаш. Сўнгги пайтда «Истеъмолчилар манфаатларига хизмат қиладиган таркибларни ташкил этиш» шиори урф бўлиб бормокда. Унинг асосида оддий фуқароларнинг эҳтиёжларини қондириш масаласини давлат фаолияти марказига кўтариш ётади. Шу мақсадда хизмат кўрсатишнинг аниқ меъёрлари жорий қилинади. Фуқаролар хукумат органлари қарорларига таъсир ўтказиш имкониятини қўлга киритадилар. Ҳукумат ўз фаолиятига оид барча ахборотларни кенг омма эътиборига очиқ ҳавола қилади. Давлат хизматлари сифатига бўлган бундай эътиборнинг сабаблари нафақат аҳоли қизиқишларини ҳисобга олишдан, балки фуқаролар таълими, малакаси ва соғлиғи даражаси ўртасидаги бевосита алоқадан (у давлат хизматлари сифати даражаси билан узвий боғлиқ) янада унумли фойдаланишдан ҳам иборатдир.