Тадбирлар номи

Мустаҳкамлаш саволлари:
1. Ҳунармандчилик маҳсулотларининг аҳоли турмушидаги аҳамияти.
2. Устоз ва шогирд муносабатларининг шаклланиши.
3. Ҳунармандчиликда ихтисослашув деганда нимани тушунасиз?
4. Шаҳарлар, шаҳар маҳаллаларининг ҳунармандчилик маҳсулотларига ихтисослашуви қандай бўлган?
5. Ҳунармандчилик маҳсулотларининг турлари ҳақида сўзлаб беринг.
6. Айрим ҳунармандчилик ишлаб чиқаришининг сабаби нимада?

6-МАВЗУ: ФАРҒОНА ВОДИЙСИДА САНОАТ КОРХОНАЛАРИНИНГ ВУЖУДГА КЕЛИШИ.

РЕЖА:
1. Чор Россиясининг Туркистон ўлкасида, хусусан, унинг шаҳарларида олиб борган иқтисодий сиёсати.
2. Фарғона водийсида пахта тозалаш заводларининг вужудга келиши ва саноатнинг бошқа турлари.
3. Маҳаллий ишчилар синфининг шаклланиши ва уларнинг меҳнат шароитлари.


1. Чор Россиясининг Туркистон ўлкасида, хусусан, унинг шаҳарларида олиб борган иқтисодий сиёсати.
Россия Туркистонни қисқа муддатда ўз саноати учун хом ашё манбаига айлантирди. Агар 1885 йилда пахта майдони 41,4 минг танобни ташкил қилган бўлса, 1915 йилга келиб, у 541,9 минг танобга етди, яъни 13 баробарга ўсди. Ўлка Россиянинг асосий пахта базасига айланди. Бу ҳақда Туркистон жадидлари етакчиларидан Убайдуллахўжа Асадуллахўжаев1917 йил июлp ойида Қозонда ўтган 2-Бутунроссия мусулмонлар қурултойида шундай деган эди: «Шу кунгача Туркистон рус капиталистлари учун говмиш сигир бўлиб келмоқда. Бугунда Туркистон Россияга пахта етказувчидир. Ҳуназгача тўхтамаётган уруш туфайли пахтага эҳтиёж тобора ортиб бормоқда, чунки у порох тайёрлашда керакдир. Агар урушгача бўлган даврда Америка пахтасининг 1 пуди Россияга 18 сўмдан тушган бўлса, ҳозирда барча молларга нарх-наво 3 баробар ошганда, 1 пуд Туркистон пахтаси Россия томонидан 7 сўмдан 10 сўмгача сотиб олинмоқда, ҳолбуки, 1 пуднинг баҳоси ҳозирда 20 сўмни ташкил қилиши лозим. Демак, Туркистон пахтакорлари ҳар пуд пахтадан 10-12 сўм зарар кўришмоқда. Бундан шундай хулоса чиқадики, агар Туркистонда йилига 10-12 миллион пуд пахта етиштирилса, у ҳолда бизнинг пахтакорлар томонидан ишлаб топилган 100 миллион сўм ҳар йили рус капиталистлари чўнтагига тушмоқда».