Сурункали обструктив ўпка касалликлари (СОЎК). Ўпка емфиземаси,етиология,патогенез,клиникаси,ташхислаш ва даволаш

Ўпкани сурункали обструктив касаллигини қўзиш даврида оғирлик даражасидан келиб чиқиб даволаш


I енгил даражасида бета-2 агонистлар билан антихолинэргик препаратлар комбинацияси (беродуал) ёки антихолинэргик препаратлардан атровент 20 мг 2-4 та ингаляциядан кунда 3-4 марта биринчи танлов аэрозоли сифатида ишлатилади. Шошилинч ёрдам мақсадида тез таъсирга эришиш учун β 2- агонистлар вакили салбутамол қўлланилади. Юқоридагилар самара бермаганда узоқ таъсир этувчи β 2-агонистлардан салметерол тавсия этилади.
II ўртача оғир даражасида юқорида таъкидлаганимиздек қисқа муддат таъсир этувчи ингаляцияда қўлланиладиган бронходилататорлар билан биргаликда базис дорилар (атровент 20 мг 2-4 та ингаляциядан кунда 3-4 марта ёки беродуал 2 та ингаляциядан кунда 3 марта) тизимли глюкокортикоидлар ва метилксантинлар (спейсер, небулайзер) ишлатилади. Уч кун томир ичига метилпреднизолон 125 мг ҳар 6 соатда, ундан сўнг преднизолон ичиш учун кунда 60 мг 4-7 кун, 40 мг 8-11 кун, 20 мг 12-15 кун буюрилади. Агар даво яхши самара берса ингаляциядаги кортикостероидларга ўтилади. Улар кунда 800-1000 мкг дозада ишлатилади. Жумладан, беклозон 250 мкгдан 2 марта 2 ингаяциядан пуркаш учун, узоқ таъсир этувчи будесонид форте 200 мкг, 2 марта 2 ингаяциядан, фликсотид 50; 100; 350 мкг, ингакорт (флунизолид) 2 ингаляциядан кунда 2 марта, камида 3 ой ишлатилади. Даво самарадорлигини баҳолаш учун 1ЖНЧҲ текшириб турилади. Балғам кўчирувчи дорилардан муколитиклар буюрилади.
III оғир ва IV жуда оғир даражасида М-холинолитик ва β-агонистларни беморларга мунтазам қабул қилиш бемор аҳволидан келиб чиқиб, зарур дозаларда буюрилади ва кўрсатмаларга қараб метилксантинлар ишлатилади. Агар йирингли ҳолатлар кузатилса, антибиотиклар буюрилади. Шунингдек, беморларга кислород берилади. Кортикостероидлар билан даволаш юқоридаги II-оғирлик даражасида кўрсатилган схемада, аммо бир мунча юқори дозаларда ўтказилади. Бемор аҳволи мўътадиллашгандан сўнг буюрилган кортикостероидлар 20-30 мг ушлаб турувчи дозаларда қолдирилади. Даво самара бермаган ҳолларда гормонлар билан даволаш тўхтатилади. Микроциркуляцияни яхшилаш учун 2-3 кун антикоагулянтлар (кунда 20000 ЕД) тавсия этилади.