Совуқ фронт булутлари Илиқ фронт булутлари. Окклюзия фронт булутлари

Стационар фронт булутлари

Стационар фронтлар одатда жадал бароклинник зоналар билан боғлиқ бўлмайди. Бу Ер метеорологик сунъий йўлдошлари ёрдамида кузатилган булутлик тасвирида ҳам ифодаланади. Стационар фронтлар билан боғлиқ бўлган булутлик полосаси, одатда фаол, тез ҳаракатчан фронтлар билан боғлиқ бўлган булутлик полосасидан узунроқ бўлади. Уларнинг таркиби унчалик бир жинсли эмас, ва булутлик қисмлари булутсиз зоналар билан бирин кетин алмашиб туради.

Умуман олганда стационар фронтларни фаол ва фаол бўлмаган турларга ажратиш мумкин. Бундай ажратишни Ер метеорологик сунъий йўлдошлари ёрдамида кузатилган булутлик тасвирида ҳам бажариш мумкин. Фаол стационар фронтлар анча кенг ва нисбатан узлуксиз булутлик полосасига эга бўладики, унда кўп ҳолларда фронтал тўлқинлар шаклланади. Фаол бўлмаган квазистационар фронтларга узуқ-узуқ булутлик полосаси мос келади.
Агар юқорида ҳаво оқими стационар фронт полосасига параллел бўлса, у ҳолда ер яқинидаги фронт чизиғи булутлик полосасининг марказий қисмига мос тушади. Агар стационар фронт фаол бўлса ва тўлқин ҳосил бўлиш жараёни кузатилса, у ҳолда фронтнинг совуқ ва илиқ қисмлари булутлик тасвирида циклоник ва антициклоник эгрилик бўйича жойлашади.
Стационар фронтлар ҳолатида синоптик карталардаги изобаралар деформацион майдонни ҳосил қилади, баландликда эса кичик градиентли майдон кузатилади.
Европа ва Осиё устида яхши ривожланган антициклоннинг узоқ туриб қолиши билан боғлиқ бўлган стационар фронтнинг кузатилиши оддий ҳол саналади. Бу даврда антициклоннинг жанубий ёки жануби-ғарбий чеккаларида тропосферанинг пастки қисмида жадал, изобараларга параллел бўлган жанубий оқим қарор топади. Бундай жараёнлар йилнинг совуқ даврида кўпроқ кузатилади ва кўп ҳолларда улар орографиянинг хусусиятлари сабабли вужудга келади.
Стационар фронтлар, шунингдек кўп ҳолларда ҳаво оқимини тўсиб турувчи тоғ тизмалари (масалан, Алп, Ҳимолай, Карпат) бўйлаб ўтади. Бундай ҳолатларда, Ер метеорологик сунъий йўлдошлари ёрдамида олинган расмларда фронтал булутлик полосаси тоғ тизмалари бўйлаб йўналган бўлади. Айни пайтда уларнинг асосий циклоник марказлар билан тўғридан-тўғри боғлиқлиги кузатилмайди. Атмосфера циркуляциясининг «тўсиб қўйилиши» сабабли вужудга келган стационар фронтлардаги булутлар тизими одатда меридионал йўналишга эга бўлади.