Солиқ академияси

АНЪАНАЛАР – халқларнинг тарихий ривожланиши жараёнида шаклланади ва сайқалланади. Давр талабига жавоб берган анъаналар унитилмайди, авлодларга мерос қолади, халқ ҳаётининг таркибий қисмига айланади. Ҳар бир эл, миллат ёки халқ ўз анъаналарини ривожлантиради, асраб-авайлайди.
БАРҚАРОРЛИК (ИЖТИМОИЙ) — жамият ҳаётининг осойишталиги, ундаги ижтимоий бирликлар (миллатлар, синфлар, динлар, ижтимоий ташкилотлар, сиёсий партиялар ва б.) вакилларнинг тинч тотувлиги, ҳамжиҳатлиги, жамиятдаги турли кучлар ўртасида энг муҳим масалалар, мақсадлар соҳасида ижтимоий келишув ҳолатининг мавжудлиги, ҳамкорликни мустаҳкамлаш учун шарт-шароитнинг яратилганлиги.
БУНЁДКОР ҒОЯ — жамиятни тараққиёт сари етакловчи, турли гуруҳ ва қатламларни, миллатларни эзгу мақсад йўлида биргаликда ҳаракат қилишга ундовчи, амалга оширишнинг реал асослари бўлган ғоя.
БУЮК ДАВЛАТЧИЛИК ШОВИНИЗМИ — (Шовинизм - фран. буржуа миллатчилигининг ўта реакцион формаси). Шовинизм сиёсати бошқа миллат ва халқларга нафрат ва душманликни авж олдиришга қаратилган. Шовинизм гўё тўлақонли бўлмаган бошқа миллатлар ва ирқлар устидан ҳукмронлик қилишга даъват этилган бир миллатнинг алоҳидалигини («мумтозлигини») тарғиб этади.
ВАТАН ( арабча “Ватан” – она юрт ) – кишиларнинг яшаб турган, уларни авлод ва аждодлари туғилиб ўсган жой, ҳудуд, ижтимоий муҳит, мамлакатидир. Ватан бир-бирини тақозо этувчи ташқи муҳит ва ички кечинмалар ҳамда тушунчаларни ўз ичига олади. Ташқи муҳит нуқтаи назаридан Ватан киши ёки авлодлар туғилиб ўсган ва камол топган жой, замин, ўлкадир.
ВАТАНПАРВАРЛИК – кишиларнинг ижтимоий ва маънавий-ахлоқий ҳислатларининг, фазилатларининг юксак намоён бўлиши ҳисобланади. Зеро, улар негизида ота-боболардан мерос фолган заминни севиш, урф-одатларни, қадриятларни сақлаш, эл-юрт равнақи учун чин дилдан меҳнат қилиб, Ватанни душманлардан ҳимоя қилиш, ҳар қандай қарамликдан озод этиш, ҳатто зарур бўлса, унинг озодлиги ва мустақиллиги учун жонини ҳам аямаслик кабилар ётади.