Шапка комедия Қатнашувчилар

ШАПКА
комедия
ҚАТНАШУВЧИЛАР:
С о д и қ – 40 ёш
С а н а м – Содиқнинг хотини
О р о л б о й – Содиқнинг ўғли, 12 ёш
Г у л з о р – Содиқнинг онаси
Қ о д и р – Корхона бошлиғи
Б у н ё д – Қодирнинг укаси
Б а р но – Котиба

Воқеа Содиқнинг уйида бошланади.
Тонг саҳар. Устида Реал Мадриднинг йиртилган футболкаси билан Содиқ супада ухлаб ётибди. Тепада бир чолнинг портрети илинган. Супанинг пастида эса ичи очилган бир бузуқ телевизор. Супанинг ўнг четида Санам челак билан сув сепиб, супуряпти. Молнинг овози эшитилаверади - эшитилаверади. Эрта тонгдан уйғонган Содиқнинг ўғли Оролбой эса устига Барселонанинг кийимини кийганча ҳашак ташияпти. Тозалаётган жойига ҳашак тўкилганини кўрган Санам Оролбойга:
С а н а м. (бақиради) Тозалаётганимни кўрмаяпсанми, мол. Ҳашакни тушурмай таши. (эрига қараб) Э, отангга ўхшамай… (ўша вақт эрининг уйғонаётганини кўриб, дами ичига тушиб ) Э, Реалга ўхшамай ўл.
Оролбой қовоғини солиб ўтиб кетади. Санам ҳовлини супурар экан ўзига – ўзи:
С а н а м. Э, шу фуболига ҳам ўт тушсин. Нима энди Баналдоми, Саналдоми, ҳая, Раналдоси гол урмаса телевизорда нима айб. (қўли билан кўрсатиб) телевезорни шундай олди – ю, коптокдек улоқтирди - қўйди. (Телевизорни олиб супанинг устига олиб қўяди.
Ўша пайт Оролбой онаси тозалаётган жойдан ўта туриб яна ҳашак тушириб кетади.
С а н а м. Кўрмаяпсанми, тўкиб ўтаяпсан.
Ўша пайт Содиқ ўрнидан туради.
С о д и қ. Э, фаросатингга ўт тушсин. Эрталабдан пешонамда бақиришинг шартми? Шунчалар бақиргинг келса, ана молхонага бориб бақир, ё бўлмаса сени шундай тарбиялаган онангни қулоғига бориб бақир.
С а н а м. Онамни қўшманг.