Шапка комедия Қатнашувчилар

Келин чиқиб кетади.
С о д и қ. Онажон, яхши ётиб турдингизми?
Г у л з о р. Ўчир овозингни. Иш топдингми?
С о д и қ. (ўйланиб туриб) Йўқ ҳали.
Г у л з о р. Сен бола ҳеч бир жойда ишлай олмадинг - а. У ерни у дединг, бу ерни бу дединг ахир, ниҳол ҳам бир жойда кўкаради - да, болам.
С о д и қ. (бироз сукутдан сўнг) Биламан, мен билан бирга ўқиганларнинг ҳаммаси тепага кўтарилиб кетган.
Г у л з о р. Хўш …
С о д и қ. Чунки уларнинг отаси бор.
Г у л з о р. Нима бўлибди отаси бўлса?
С о д и қ. Ҳа, отаси борларга отаси ундай қил ўғлим, бундай қил ўғлим деб маслаҳат беради. Жуда маслаҳат ҳам беролмаса, мана буни ол, ёрдам бўлади деб нафақа пулини беради. Менинг отам эса дипломимни олиб уйга келгунимча, худойимнинг олдига кетиб юборибди. (расмга қараб) Эх отам - а, ота, ўқишни тугатганимдан сўнг яна беш йил кутиб турганингизда мен ишли, жойли бўлганимдан кейин худойимнинг олдига ўзим сизни карнай - сурнайлар билан кузатиб қўймасмидим.
Г у л з о р. (Жахл билан) Ўчир - е, овозингни. (Хўрланиб, юзини рўмоли билан беркитиб) Сенга майнавозчилик бўлса бўлди. Отанг раҳматли битта ўғлим деб емай едириб, киймай кийдириб, бошқалардан кам қилмай ўқитиб сендан олган гапи шу бўлдими?! Ҳали эрта – индин мен ўлгандан кейин ҳам шунақа гапларни гапириб, у ёқда отанг билан мени тинч қўймасанг керак.
С о д и қ. Ҳазил - ку, она, қўйсангизчи шунақа гапларни.
Г у л з о р. Э-э-э-эй, ҳазилинг қурсин. Ўзи билардим - а бир кун келиб нафақамни сенга бермаётганимни юзимга солишингни.
С о д и қ. Онааааааа… (Онасини қучоқлайди)
Г у л з о р. Бор, юз қўлингни юв. (ўғлини итариб юборади) Отанг мен ўлганимдан сўнг ҳеч кимга қучоқлатма деган.
С о д и қ. (ўғлини чақиради) Оролбой.
Ичкаридан Оролбойнинг овози эшитилади.