Сценарий муаллифи: Донохон Хамидуллаева Ҳам муаллиф: Шоирахон Рустамова Режиссёр: Шохрух Ҳайдаров

18 – ЭПИЗОД.
Кадрда машина ичкариси.
Умид онаси Имонани Севинчни уйига совчиликка олиб келяпти.
Имонани кўриниши ҳам 23 йилга қаритилган. Кўринишлари грим қилиниб, сочлари оқартирилади, бошларига рўмол ўрантирилади, кўзларига очки балки тақар.
Имона: Ўғлим, севган қизингни онасини исми нимайкан?
Умид: Уни онаси ўлган ойи. Дадасини исмини билмайман. Уй манзилини ўзини биламан. Ойи, ишқилиб дадасини кўндириб чиқингда. Чунки дадаси ётоқлик касал бўп қолган, яна узатмайман, деб қолмасин.
Имона: Энди гап кетишига қарайманда, болам. Кеб қолдикми?
Умид машинасини ҳайдаб кетар, Имона эса маҳалла кўчаларига аланглаб, ичида: Эй худойима, ахир бу Саид яшайдиган маҳалла-ку. Наҳотки, Саиднинг маҳалласидан келин олсам... деб ўйлаб турганда Умид машинасини айнан Саиднинг дарвозаси олдига тўхтатади.
Умид: Мана шу ҳовли ойи.
Имона кўзлари катталашиб: Нима, шу ҳовли дейсанми? (ичида) Наҳотки, ўғлим мени қизимни севиб қолган бўлса. Лекин қизимни исми Малак эдию. Бу қизни эса исми Севинч. Балки улар бу ҳовлисини сотиб кетишгандир. Бу ерда бошқа оила яшар. Эй худойима... ичларим қалтираб кетяпти-я... Ўзинг қувват бергин... деганча секин машинадан тушади ва аста дарвозани тақиллатади.
Бироздан сўнг дарвозани қизи Севинч очади, у уялиб: Ассалому алайкум.
Имона тутилиб: Ваалейкум ассалом, қизим. Севинчойни уйлари шуми?
Севинч: Ҳа, холажон, шу марҳамат кираверинг... деб уйига бошлайди. Имона машина ичидаги ўғлига бир қараб қўяди. Умид кўзларини қисиб қўяди. Имона ҳовлига кириб кетади... ЗТМ...
19 – ЭПИЗОД.
Кадрда Саид ётган хона.
Севинч Имонани шу хонага бошлаб киряпти.
Севинч: Дадажон, Умид акани ойилари келдилар.
Саид ўрнидан ҳиёл туришга ҳаракат қилиб: Хўп, она қизим, сен чой дамлаб келгин. Қиз кулимсирабгина чиқиб кетади.
Имона Саиднинг орқасидан секин келиб, унинг рўпарасига қўйилган стулчикка ўтиради. Саидни таниб, кўзлари катта очилади.