Самиғов н. А. Бино

Безаш ойнаси

Безаш ойнаси меъморчилик, декорация ишларини бажаришда ишлатилади. Безаш ойнаси рангли, ѐрқин, ялтироқ, атмосфера муҳитига чидамли ва мустаҳкам бўлиши керак.
Безаш панеллари ойнаси (стемалит) тобланган жилоланган қалин ойна (6 мм) ички юзасига рангли керамик бўѐқлар қопламаси суртилиб олинади. Стемалит жамоат бинолари-меҳмонхоналар, вазирликлар, экспомарказлар ва ш.к. ларни безашда ишлатилади.
Марбилит қалин (12 мм) рангли ойна бўлиб, бир томони жилоланган ва иккинчи томони эса ғадир-будур бўлади. Марбилит биноларни ички ва ташқи томондан безашда, дераза ости тахталари, сотув витриналари, иш столлари тайѐрлашда ишлатилади.
Эмалланган шиша плитка 150х150, 150х175 мм ўлчамларда, қалинлиги 3-5 мм қилиб чиқинди ойнадан шиша эмали қоплаб тайѐрланади. Эмалланган ойна қуритилгач, хумдонда куйдирилади. Маҳсулот биноларнинг ички безаги учун ишлатилади.
Шиша мозаика гилам мозаика ва смалт турларига бўлинади. Гилам мозаика 20х20 мм ѐки 25х25 мм ўлчамдаги сўниқ рангли плиткалардир. Смалт рангли шиша бўлаклари бўлиб, бадиий мозаика ҳосил қилишда ишлатилади. Гилам мозаика ва смалт қурилиш-меъморчиликда паннолар, суратлар барпо этишда қўлланилади.
Кўзгу ойнаси жилоланган 4-10 мм қалинликдаги ойнанинг бир томонига юпқа алюминий ѐки кумуш қопланиб тайѐрланади. Кўзгу ойна биноларнинг ички безаги учун ишлатилади.

2. Шиша буюмлар ва конструкциялар

Ковакли шиша блоклар пайвандланган икки бўлакдан иборат бўлиб, нурни таратувчи, иссиқлик ва товуш изоляцияловчи хусусиятларга эгадир. Шиша блок ички томонидаги чизиқли бўртмалар нурни таратишга ѐрдам беради. Уларнинг нур ўтказувчанлиги 65% дан кам эмас, нурни таратиши 25%, иссиқлик ўтказувчанлиги 0,4 Втм⁰С атрофида бўлади. Шиша блоклар рангли ва кўп бўлмали бўлиши мумкин. Улар сантехкабиналарда, маиший хизмат, овқатланиш муассасаларида, зинапоя бўлмаларида ишлатилиши мумкин. Шиша блоклар темирбетон каркас ичига махсус қоришма билан терилиб конструкция тайѐрланади. Улар ѐнмаслик талаблари қўйиладиган саноат ва жамоат биноларида ишлатилади (11.3-расм).