Самиғов н. А. Бино

Ситаллар ва улар асосидаги буюмлар

Ситаллар – шиша кристаллар шишани қисман ѐки тўла кристаллаш усулида олинади. Ситалл олиш учун шиша хом ашѐси ва махсус минерал қўшилмалар жуда тоза ҳолда ишлатилади. Ситаллга махсус хусусиятлар бериш учун кристалланиш катализаторлари – титан, литий, цирконий ва ш.к. бирикмалари эритилган ҳолатида аралаштирилади. Ситалл олишда шихта қўшимча равишда иссиқлик билан қайта ишланади; бунда шиша кристалланади ва муайян хусусиятларга эга бўлади. Ситаллар кулранг, қора, жигарранг, крем рангида, рангли, шаффоф ва хиралашган бўлиши мумкин. Улар атмосфера ва агрессив муҳитларга, юқори ҳароратга бардошли бўлади. Диэлектрик хусусиятидан эса, электр ҳароратга бардошли изоляторлар тайѐрлашда фойдаланилади.
Ситалларнинг сиқилишидаги мустаҳкамлик чегараси 500МПа, иссиққа бардошлиги 200-700⁰С, ҳатто 1000⁰С бўлади.
Шлакситалл металлургия шлаки, кварц қуми ва кристаллизаторларни махсус хумдонларда аралаштириб тайѐрланади. Кристаллизаторлар сифатида титан, фосфор оксидлари, фтор тузлари, темир ва марганец сулфатлари массага нисбатан 4-5% ишлатилади. Шлакситалл оқ рангли, ясси ва махсус юзали (силлиқланган, жилоланган) ҳолда чиқарилади. Унинг юзасига керамик сирловчи материаллар билан исталган ранг бериш мумкин. Шлакситалл ўртача зичлиги 2500-2600 кгм³, сиқилишдаги мустаҳкамлик чегараси 500-600 МПа, эгилишдаги мустаҳкамлиги 90-130МПа, эластиклик модули 11^.10⁴ МПа, ишлатилиш ҳарорати 950⁰С гача бўлади. Шлакситалл кимѐвий муҳитларга чидамли, сув ўтказмайди, кам едириладиган бўлгани учун тротуар, йўл қопламаларида, бордюр тошлари ўрнида, биноларни ички ва ташқи томонлардан безашда, том ѐпишда, деворбоп буюмлар сифатида ишлатилиши мумкин.
Кўпикситалл уячали структурага эга бўлиб, сув шимувчанлиги ва гигроскоплиги кичик, иссиққа бардошлилиги 750⁰С бўлади. У иссиқлик ва товушдан изоляцияловчи материал сифатида ишлатилади.
Ситаллопластик фторопласт ва ситалл асосида олинади. Унинг едирилишга ва кимѐвий муҳитларга чидамлилиги ўта юқори бўлгани учун антифрикцион ва конструктив материал сифатида ишлатилади. Бунда кукун ҳолатидаги ситалл фторопластга ўта майда тўлдирувчи сифатида аралаштирилади.