Samarqand davlat tibbiyot instituti

83 
Bundan tashqari, qon quyishning almashinuv usulda quyish turi ham 
mavjud. 
a) 
To‘g‘ridan-to‘g‘ri qon quyish.
 
To'g‘ridan-to‘g'ri qon quyish 
deganda bevosita donorning qonini stabillamasdan va tegishli tartibda 
saqlab qo‘ymasdan bemorga quyish tushuniladi. Ushbu usulda faqat 
yaxlit qon quyiladi. Bevosita qon quyishning quyidagi usullaridan ham 
foydalanish mumkin: 
1. Plastik naycha orqali donor va retsipiyent vena qon tomirini 
to‘g‘ridan-to‘g‘ri ulab qo‘yish orqali (uzluksiz usul) o’tkazish. 
2. Donordan shprits bilan qon olib (20 ml), so'ngra imkoni boricha 
tez muddat ichida retsipiyentga quyib turish (uzluksiz usul). 
3. Maxsus apparatlardan foydalangan holda bo‘lib-bo‘lib quyish. 
To'g‘ridan-to'g‘ri qon quyishning quyidagi afzalliklari: qonda 
konservantlarning tushmasligi, yangi, issiq va o‘zining barcha 
funksiyalarini saqlaganligi mavjud. 
Kamchiliklari: retsipiyent qon tomiri ichiga mayda tromblarning 
kirib qolishi xavfi; yetarlicha to‘liq tekshirilmagan donor qonini quyish; 
donorning infeksiyalanish xavfi (!). 
Keltirilgan kamchiliklar, ayniqsa oxirgisi, donorlikning asosiga 
putur yetkazib, shunga olib keldiki, hozirgi kunda klassik ko’rinishdagi 
to‘g‘ridan-to‘g‘ri qon quyishdan amaliyotda foydalanilmaydi. 
Quyidagi zarur hollarda issiq donor qoni quyiladi: rezervdagi donor 
chaqirilib, undan stabilizatorli shishaga (paketga) qon olinadi va bevosita 
qon olingandan keyin boshqa xonada ushbu qon retsipiyentga quyiladi. 
Shunday qilib, bu usulda yangi, issiq va o’zining barcha 
funksiyalarini saqlagan qon quyiladi, bunda donordan qon olish va 
retsipiyentga gemotransfuziyani o’tkazish vaqt va makon bo’yicha o‘zaro 
bo‘shliqqa ega, bu esa donorning biror-bir infeksiyalanish imkonini 
istisno qiladi.