Самарқанд давлат университети ҳузуридаги педагог кадрларни қайта тайёрлаш ва уларнинг малакасини ошириш минтақавий маркази

Жиҳоз ва асбоблар–бу аудитория фонди, техник воситалар жамламаси, ўқув жараёнида қўлланиладиган ташкилий ва ўқув методик материаллар каби таълим хизматларида қўлланиладиган омиллар ҳисобланади. Фан бўйича ўқув жараёнида қўлланиладиган ташкилий ва ўқув методик материаллар мажмуаси сифатида Ўқув услубий мажмуа намоён бўлади. Техник воситаларга синф докаси ва бўр, мультимедия проектори ва компъютер синфи, лобаратория жиҳозлари ва бошқалар киради. Фан хусусиятларини ҳисобга олган ҳолда бу воситаларнинг мавжудлиги ва тури таълим жараёнининг натижалилиги ва самарадорлигига жиддий таъсир кўрсатади.
Натижани баҳолаш воситалари-фан бўйича жорий ва якуний назоратда қўлланиладиган воситалар: тест, тест ўтказишда қўлланиладиган компъютер дастурлари, экспертлар томонидан қарор қабул қилишда фойдаланадиган баҳолаш шкаласи (тизими), рейтинглар ва мезонлар ҳисобланади. ОТМ таълим дастурларини ўзлаштириш сифатини жорий назорат, таълим олувчиларни оралиқ ва битирувчиларни якуний аттестация қилиш орқали баҳолайди. Уларни ўтказиш шакли, муддати ва даврийлиги ҳамда баҳолар тизими тегишли йўриқномалар билан тартибга солиб турилади ва масъул ходимлар томонидан тасдиқланади.
Ишчи муҳит–таълим хизматларини тақдим этиш жараёни юз берадиган мажмуали муҳит, шароит ҳисобланади. Ишчи муҳит таълим жараёни юз берадиган ташқи муҳит омилларига ва ўқитувчи томонидан фойдаланиладиган ва талабалар билан ўзаро алоқа қилиш услубига хос омилларга боғлиқ бўлади.

Ишчи муҳитни ўрганиш ва тушуниш керак, у талабаларнинг самарали фаолиятини таъминлаши зарур. Унда мажбурлаш ва қўрқув каби омилларга таянган таъсир этиш шакли бўлмаслиги зарур. Қўрқув талабанинг онги тушуниш фаолиятини чеклаб қўяди. Қўрқув муҳитида талаба ўзини ҳимоялаш учун ҳар нарса(алдов, ёлғон)га тайёр туради.

Ўқитувчи ишчи муҳитнинг мураккаблигини ҳис этиши ва барча чораларни кўриши, талабаларни ортиқча ишлар билан қийнамаслиги, мажбурламаслиги, қўрқитмаслиги зарур. Аксинча ўз иш услуби орқали фанни ўзлаштиришда талабалар томонидан қониқиш хиссини шакллантириш имкониятини берувчи юқори иш самарадорлигини таъминлаши зарур.