С. У. Меҳмонов, Д. Й. Убайдуллаев бюджет ташкилотларида бухгалтерия ҳисоби

2.7.3-расм. Бюджет ташкилотларида асосий воситалар ва қурилиши тугалланмаган биноларни (иншоотларни) сотилиши тартиби ва сотишдан тушган маблағларни сарфланиш йўналишлари

Беғараз бериш натижасида балансдан чиқариш

Асосий воситаларни беғараз бериш юқори ташкилот билан келишилган холда қонунчиликда белгиланган тартибда амалга оширилади.

Ташкилотлар томонидан асосий воситалар беғараз берилганда унинг дастлабки (тикланиш) қийматини ҳисобдан чиқарилиши 01 счётнинг тегишли субсчётлари кредитида, қолдиқ қийматини ҳисобдан чиқарилиши кирим қилиш манбасидан келиб чиққан ҳолда хақиқий харажатларни ҳисобга олувчи 231, 241, 251, 261 ёки 271 субсчётларнинг дебетида, ҳисобланган эскириш суммасини ҳисобдан чиқарилиши эса, 02 счётнинг тегишли субсчётлари дебетида акс эттирилади.
Шартли мисол. Бюджет ташкилотининг бюджетдан ташқари ривожлантириш жамғармаси маблағлари ҳисобидан сотиб олинган ва дастлабки (тикланиш) қиймати 20.0 млн.сўм бўлган (015-субсчёт бўйича), мазкур давга қадар ҳисобланган эскириш суммаси 15.0 млн.сўм (025-субсчёт бўйича) ва қолдиқ қиймати 5.0 млн.сўм бўлган транспорт воситаси бошқа ташкилотга беғараз берилди.
Мазкур операция бухгалтерия ҳисобида қуйидагича акс эттирилади:
Дебет 261 субсчёт 5.0 млн.сўм;
Дебет 025 субсчёт 15.0 млн.сўм;
Кредит 015 субсчёт 20.0 млн.сўм.
Агарда бюджет ташкилотлари (юқори маблағ тақсимловчи) томонидан ўзининг қуйи ташкилотига (яъни, тегишли молия органига мазкур қуйи ташкилотнинг балансини ўзининг балансига жамлаган ҳолда тақдим қилинадиган ҳолларда) асосий воситалар беғараз (балансдан балансга ўтказиш йўли билан) берилаётган бўлса, у ҳолда юқори ташкилот томонидан мазкур операция Дебет 28 счётнинг тегишли субсчётлари ва Кредит 01 счётнинг тегишли субсчётларида акс эттирилади. Агарда эскириш суммаси мавжуд бўлса, эскириш суммасига Дебет 02 счётнинг тегишли субсчётлари ва Кредит 01 счётнинг тегишли субсчётлари бўйича акс эттирилади.
Қуйи ташкилот томонидан кирим қилиниши эса, Дебет 01 счётнинг тегишли субсчётларида ва Кредит 28 счётнинг тегишли субсчётлари
(эскириш суммасига Кредит 02 счётнинг тегишли субсчётлари) бўйича акс эттирилади.