Рўйхати махсус саволлар

45-казус
БМТнинг агенти жаноб Майкл Девид Н. ва Г. мамлакатлари ўртасидаги урушларни олдини олиш учун Генрий Маккартур ва Георг Беловлар билан биргаликда Н давлатига юборилди. Н. давлатида бир қанча самарали дипломатик ишларни амалга оширганларидан сўнг улар Г. давлатига йўл олишди. Aммо Г. давлатида улар жойлашган БМТ хавфсизлик қароргоҳига Г. давлатидаги қуролли гуруҳ ҳужум қилди. Натижада БМТ агентлари ҳалок бўлди ҳамда БМТнинг мулкларига катта зарар етказилди. Шундан сўнг БМТ ўзининг асосий органларидан ҳисобланган Халқаро Судга мазкур масала бўйича БМТ даъвогар бўлиб чиқа олиши ёки йўқлиги борасида консултатив хулоса беришини сўраб мурожаат этди. Шунингдек, Г. давлатидаги қуролли гуруҳ давлат билан алоқадор эканлиги, яъни уларга Г. давлати хавфсизлик қўмондони томонидан топшириқ берилганлиги боис, уларнинг ҳаракатларини давлат ҳаракати деб топишини ҳамда Г. давлатдан компенсация ундиришни сўраб мурожаат қилади. Г. давлати эса БМТга аъзо бўлмаганлиги боис Халқаро суд унинг устидан консултатив хулоса бера олмаслигини таъкидлайди ҳамда фақатгина Хавфсизлик қўмондони жавобгарликка тортилиши қўмондоннинг ҳаракатлари давлат ҳаракатлари бўлмаслигини айтиб, компенсация тўлашдан воз кечади.
Вазиятга ҳуқуқий баҳо беринг.
Ўзингизни Халқаро суд судьяси сифатида тасаввур қилинг ва БМТнинг даъволари ҳамда БМТга аъзо бўлмаган Г давлатининг даъволарини ҳисобга олиб, давлат ҳаракатлари борасидаги билимларингизга таяниб фикрларингизни баён этинг.


46-казус
A. давлати ўзининг собиқ мустамлакалари ҳисобланмиш Б. ва C. мамлакатларини ўз таркибида сақлаб қолиш учун барча ҳарбий кучларини сафарбар қилди. Aммо шу орада фуқаролар ўртасидаги уруш ҳам бошланиб кетди. Кўпчиликни ташкил этувчи A. давлати фуқаролари Б. ва C. давлати фуқароларига ҳужум уюштиришни режалаштираётгани аввалдан аниқ эди. Шу сабабли кенг кўламда амалга оширилиши мумкин бўлган геноцидни олдини олиш мақсадида Бирлашган Миллатлар Ташкилоти ҳамда унинг таркибида бўлган Голландия ҳарбийлар полки Б. ва C. давлати фуқароларини ҳимоя қилиш учун Хавфсизлик Кенгаши резолюциясига кўра юборилди. Aммо қўшинлар айтилган вақтга етиб кела олмадилар ва бунинг натижасида
Б. ва C. давлатлари ҳали кўчишга улгурмаган аҳолиси хавф остида қолиб кетди. A .давлати айирмачилари томонидан қилинган ҳужум натижасида
Б. ва C. давлатларининг 8000 нафар ҳимояга чиққан эркак фуқаролари геноцид қурбонига айландилар. Орадан бир йил ўтиб ҳалок бўлган фуқароларнинг оналари ва аёллари Голландия Олий судига Голландия ва БМТ устидан компенсация тўлаб бериш бўйича даъво билан чиқишди.
Вазиятга ҳуқуқий баҳо беринг.
Ўзингизни Голландия Олий суди судьяси сифатида тасаввур қилинг ва Б. ва C. давлатдан бўлган даъвогарларнинг даъволари ҳамда давлат, халқаро ташкилотларнинг имунитети ҳамда жавобгарлиги масалаларини ҳисобга олган ҳолда фикрларингизни баён этинг.