Рўйхати махсус саволлар

41-казус
Германия Федератив Республикаси ва Гана давлати ўртасида ўзаро манфаатларга асосланган шартнома тузилди. Шартномага кўра, Гана давлати Германияга ўз ҳудудидан қазиб чиқарилаётган ер ости бойликларини олиб чиқиб кетиш бўйича бошқа хорижий давлатларга нисбатан имтиёзлироқ нормалар жорий қилишга, Германия эса Ганадаги “дуала” қабиласи аъзоларини Германияда Федерация ҳисобидан таълим олишлари, Ганага, мутахассислар юбориш ва Гамбург университетининг маҳаллий филиалини очиш мажбуриятини олди. Шартнома имзолангач, Ганадан келган талабалар дуала эмас, балки “гжуала” қабиласига мансублиги, Ганада дуала номли қабила мавжуд эмаслиги маълум бўлди. Гана давлати бу хатолик туфайли шартномадан ўзига олган мажбуриятни бажаришдан бош тортди, Германия эса аксинча бу хато иккинчи тарафнинг айби эканлигини ва бунинг учун ўзи зарар кўрмаслигини, фақатгина дуала қабиласи учунгина имтиёзли таълим берилишини, бироқ Гана ўз мажбуриятини ҳар қандай ҳолатда ҳам бажариши лозимлигини таъкидлайди.
Мазкур ҳолатга ҳуқуқий баҳо беринг.
Халқаро ҳуқуқда шартномалардаги хатолар ва уларни тузатиш тартибини тушунтиринг.


42-казус
A. давлат фуқароси ўзиниг инсон ҳуқуқлари бузилганлиги бўйича ички судлардан рад жавобини олгач ўз давлати устидан у аъзо бўлган Европа Инсон Ҳуқуқлари тўғрисидаги конвенцияга асосланиб, Европа Инсон Ҳуқуқлари Судига мурожаат қилди ва унинг судга мурожаат қилиш ҳуқуқи конвенциянинг Одил Судлов тўғрисидаги 6-моддасига кўра бузилганлигини таъкидлади. A. давлат эса, 6-модда у томонидан бузилмаганлигини ҳамда мазкур модда фақатгина суд жараёнида ҳуқуқи бузилганларга нисбатан татбиқ етилишини таъкидлади. Суд ишни кўриб чиқар экан 6-модда ҳақиқатдан ҳам фақатгина суд жараёнида ҳуқуқи бузилганларга нисбатан татбиқ этилишини айтди. Бироқ, конвенция преамбуласига мурожаат қилган ҳолда у ерда «ҳуқуқ устуворлиги»ни таъминлаш аъзо мамлакатларнинг асосий мақсади сифатида белгиланганлигини ифодалаб, ҳуқуқ устуворлиги ўз ичига судга мурожаат қилиш ҳуқуқини ҳам олишини таъкидлайди ва ишни фуқаро фойдасига ҳал қилиб беради.
Вазиятга ҳуқуқий баҳо беринг.
1969 йилги Халқаро шартномалар ҳуқуқи тўғрисидаги Вена конвенциясининг 31 ва 32-моддаларига асосланган ҳолда фикрларингизни баён қилинг.