Рўйхати махсус саволлар

25-казус

Тошкент вилояти Бекобод туманида истиқомат қилувчи фуқаро К. Воҳидов ўзи жуда яхши кўрадиган бир болага тутинган ота бўлмоқчи. Лекин у бундан аввал ҳам фарзандликка бола олган ва суд томонидан фарзандликка олиши бекор қилинган шахс ҳисобланади.

Вазиятга ҳуқуқий баҳо беринг?
26-казус
Тошкент шаҳрида жойлашган М.Н. номли давлат корхонасида ишловчи фуқаро Д. Жалилова ҳамда фуқаро Н. Тўраевалар иш вақтида тортишиб қолдилар. Шундай вазиятда фуқаро Н. Тўраева Д. Жалилованинг фарзандлари билан, шу билан бирга, турмуш ўртоғи билан бўлган муносабатларда ўта қаттиққўллик ва худбинлик қилишини айтиб ўтди. Д. Жалилова бу гаплардан жуда қаттиқ ранжиди ва унинг устидан конституциявий судга ариза беришини айтди. Лекин Н.Тўраева ўзининг ноқонуний ҳаракат қилмаганлигини таъкидлади.
Вазиятга ҳуқуқий баҳо беринг.
27-казус
Самарқанд вилояти Пастдарғом туман прокуратураси томонидан туман ҳуддудида жойлашган пахтани қайта ишлаш заводининг ишчиларига 6дан бери ойлик иш ҳақлари берилмаётганлиги ҳолати бўйича олиб борилаётган текширув ҳаракатлари юзасидан, ишчиларнинг бир гуруҳи юқоридаги масаланинг қонуний, ҳар томонлама ва ҳолисона ҳал этилишини назарда тутишиб, мазкур ишчиларнинг аризаларини улар истиқомат қиладиган ҳудуд прокуратурасига юборишни сўраб, туман прокуратурасига мурожаат қилдилар.
Вазиятга ҳуқуқий баҳо беринг.
28-казус
Судланувчи Т.О. содир этган жинояти юзасидан тегишли жиноят ишлари бўйича туман судининг ҳукми эълон қилиниб, унга ҳукм қонуний кучга киргунга қадар ёки ҳукм қонуний кучга киргандан сўнг шикоят қилиш тартиби ҳақида тушунча берилган. Ҳукм қонуний кучга киргач маҳкум Т.О. ҳукмдан норози бўлиб, шикоят қилишини билдирди. Шу сабабли, у апелляция тартибида шикоят беришини маълум қилди.
Вазиятга ҳуқуқий баҳо беринг.


29-казус

Самарқанд шаҳрида истиқомат қилувчи фуқаро М. Халилов мазкур шаҳар марказида жойлашган СамДУ қошидаги академик лицейга ишга киришни ният қилган. Унинг режаларига кўра, у ариза ёзади ва ишга қабул қилишини сўраб директор билан суҳбатлашади, агар директор уни ишга қабул қилмаса унга пора таклиф қилади, пора олишга рози бўлган директорга у “Сиз менинг прокуратурага берадиган кўрсатмамга кўра пора олганликда айбланиб жазоланасиз. Бундай бўлишини истамасангиз мени ишга олишингизга тўғри келади”- деган гапларни айтади.

Вазиятга ҳуқуқий баҳо беринг.


30-казус

Тошкент вилояти Олмалиқ туманида жойлашган 103-сонли МТТ нинг мудираси ўз қўл остидаги ишчиларга, жумладан, тарбиячиларга, қоровулларга, бундан ташқари ҳамширага ҳам ташкилот ҳовлисини ҳар куни икки маҳалдан тозалаш тўғрисида топшириқлар беради. Дам олиш кунлари ҳисобланган ҳар шанба ва якшанба кунлари ҳам 5 тадан ходим тозалик ишларини давом эттиришади.

Вазиятга ҳуқуқий баҳо беринг.
31-казус
Ишхонада (эътиборсизлигингиз сабабли) шахсий буюмингиз йўқолди. Сиз буюмингизни унутиб қолдирган хонада (бинода) кузатув камералари мавжуд эмас. Кимга мурожаат қиласиз? Қандай йўл тутасиз?
32-казус
Ишлаш жойингизда коррупцион ҳолат амалга ошиш эҳтимолини сездингиз. Кимга мурожаат қиласиз? Шу ҳаракатни амалга оширмоқчи бўлган ходим (ҳамкасбингиз) билан гаплашасизми ёки тегишли органга қўнғироқ қиласизми?