Republic of uzbekistan

Mavzu: “O‘zbekiston – umumiy uyimiz!”
O‘zbekiston millatlararo totuvlik va diniy bag‘rikenglik sohasida o‘z an’analariga doimo sodiq bo‘lib, bu yo‘ldan hech qachon og‘ishmasdan ilgari boradi. Mamlakatimizda turli millat va diniy konfessiyalar vakillari o‘rtasida o‘zaro hurmat, do‘stlik va ahillik muhitini mustahkamlashga birinchi darajali e’tibor qaratiladi. Bu – bizning eng katta boyligimiz va uni ko‘z qorachig‘idek asrab-avaylash barchamizning burchimizdir.

SHavkat MIRZIYOEV,

O‘zbekiston Respublikasi Prezidenti
Millatparvarlik nima?
Millatparvarlik – insoniyat taraqqiyotida millatlarning o‘rni va ahamiyatini to‘g‘ri tushunish, Er yuzining har bir burchagida mavjud millatlarni tili, turmush tarzi, irqi, tashqi qiyofasi, urf-odatlari, dini, madaniyatining o‘ziga xos tomonlaridan qat’i nazar, hurmat qilish, ularning ozodligi, tengligi, gullab-yashnashi uchun shart-sharoitlar yaratib berish tarafdori bo‘lish.

Millatparvarlik har bir kishidan millatlar va milliy munosabatlar sohasida chuqur bilimli bo‘lishni, millatlar insoniyat tarixida, uning moddiy va ma’naviy madaniyatining shakllanishida, hozirgi zamon sivilizatsiyasining rivojlanishida jiddiy mavqega ega ekanligini bilishni taqozo etadi. Millatparvarlik barcha millatlarga barobar hurmat bilan qarash, demakdir.

O‘z millatini boshqa millatlardan afzal ko‘rib, unga imtiyozlar berishni talab qilish yoki aksincha, o‘z millatiga, uning tili va madaniyatiga befarq qarash millatparvarlik qoidalariga ziddir. SHu bilan birga, millatparvarlik barcha millatlarni, ularning farq va tafovutlarini hisobga olmay turib tenglashtirishni inkor etadi. Har bir millatga bo‘lgan munosabat shu millatning istiqomat qilib turgan muayyan sharoitlari, tarixi, uning shu asosda boshqa millatlar bilan o‘zaro munosabatlariga bog‘liq.

Millatlar ham insonlardek xilma-xil va turli-tuman bo‘lganligi bois, milliy munosabatlarda, har bir millatga nisbatan siyosat o‘tkazishda nihoyatda ehtiyotkorlik, muomala madaniyati va e’tiborchanlik talab qilinadi. Har bir insonning millatparvarligi avvalambor uning o‘z millatiga, uning tiliga, madaniyatiga, an’analari, urf-odatlari va rasm-rusumlariga bo‘lgan munosabatida namoyon bo‘ladi. Lekin, millatparvar bu doirada cheklanib qolmaydi, boshqa millatlarni o‘z millati bilan teng ko‘radi.

Mustaqil O‘zbekistonning yuksalishi, o‘zbek millati gullab-yashnashining tarafdori bo‘lgan har bir inson millatparvarlik qoidalariga sodiq bo‘lishi kerak. CHunki, davlatimizning kelajagi, birinchi navbatda, o‘zbek millatining uyushqoqligi, g‘ururi, tadbirkorligi hamda milliy hududimizda istiqomat qilib turgan har bir kishining, millati, dini, tili va e’tiqodidan qat’i nazar, ko‘nglini ola bilish, uni umummilliy mafkuramiz atrofida birlashtirishga, jipslashtirishga bog‘liq. O‘zbekistonda yashab turgan 130 dan oshiq millat va elat vakillari shu yo‘ldan bormoqdalar. SHu sababli mustaqillik yillarida millatlararo hurmat-izzat va hamkorlik mustahkamlanib bormoqda.