Republic of uzbekistan

O‘zbekistonda millatlararo munosabatlar
O‘zbekiston Respublikasi milliy etnik jihatdan o‘ziga xos xususiyatga ega. Ayni vaqtda O‘zbekiston xududida o‘z madaniyati va o‘z an’analariga ega bo‘lgan 130 dan ortiq millat vakillari yashaydi. Ular ham mamlakatning barcha fuqarolari qatori bir xil huquq va majburiyatlarga ega.

O‘zbekiston Respublikasi Konstitutsiyasining 4-moddasida ko‘rsatilganidek, O‘zbekiston Respublikasi o‘z hududida istiqomat qiluvchi barcha millat va elatlarning tillari, urf-odatlari va an’analari hurmat qilinishini ta’minlaydi, ularning rivojlanishi uchun sharoit yaratadi.

O‘zbekistoning milliy-madaniy rang-barangligi milliy o‘zlikni anglashning o‘sishi va ma’naviy jixatdan qayta uyg‘onish bilan chambarchas bog‘liq bo‘lib, jamiyatning yangilanishi, uning ochikligining qudratli omili bo‘lib xizmat qiladi hamda respublikaning jaxon hamjamiyatiga qo‘shilishi uchun qulay shart-sharoitlar yaratadi.

Ko‘pmillatli mamlakat siyosatining asosiy maqsadi millatlararo totuvlik va diniy bag‘rikenglikni shakllantirish bo‘lishi zarur. Mustaqillikning ilk kunlaridanoq milliy siyosatning o‘ziga xos yo‘li ishlab chiqildiki, ayni shu siyosat milliy bag‘rikenglikning barqaror rivojlanishiga zamin yaratdi. O‘zbekistonda shakllangan bunday milliy bag‘rikenglikdan keng dunyo jamoatchiligi o‘rnak olishga intilayotgani ham bejiz emas.