Режа: Вагонларнинг юк кўтаришидан ва сиғимидан фойдаланиш

16.3. Вагонларни юк кўтаришидан фойдаланишни яхшилаш бўйича чора – тадбирлар.
Вагонларнинг юк кўтариши ва сиғимидан фойдаланиш даражасига юкнинг ҳажмий массаси ва зичлиги, вагон конструкциясининг ташиладиган юкнинг характерига мослиги, платформа ва ярим очиқ вагонларнинг ҳажмини оширадиган мосламалардан фойдаланиши, идиш ва ўровларнинг характери, ортиш усуллари ва шартлари боғлиқ бўлади.
Вагонларни юк кўтаришидан ва сиғимидан фойдаланишни яхшилаш учун станцияларда турли комплекс чора – тадбирлар амалга оширилади. Оммовий тўкилувчан юкларни ярим очиқ вагонга бортидан баландроқ “қалпоқ” (шапка) усулда ортиш нафақат вагон кузови бортини юқори сатҳигача бўлган ҳажмини, балки унинг габаритини юқори қисмидан ҳам фойдаланиш имконини беради.
Ортишнинг бу усули ҳажмий массаси вагоннинг солиштирма юк кўтаришидан кичик (γ < Pсол) бўлган, тўкилувчан юкларни ва ўрмон материалларини ташишда қўлланилади (16.1-расм).
Думалоқ ўрмон материалларини ва тилинган материалларни ҳаракатдаги составнинг габаритининг юқори торайган қисмига “қалпоқ” усулида ортиш платформа ва ярим очиқ вагонга қўшимча 20 – 25 % юк ортиш имконини беради. Ҳажмий массаси катта бўлмаган тўкилувчан юкларни (торф, кокс ва бошқалар) ташиш учун платформа ва ярим очиқ вагонларнинг бортлари баландлиги 800 – 900 мм ли қўшимча бортлар ёрдамида кўтарилади (16.2-расм) ва бу бортлари кўтарилган ярим очиқ вагонлардан чархпалак (вертушка) лар ташкил этилади.
Баъзи бир юклар (пахта толаси, пичан, металл қириндиси) ни пресслаш юк жойларини (той, боғлом) алоҳида ўлчамларини кичрайтириш ёки кичрайтирмасдан юкни юкни ҳажмий массасини ошириш имконини беради ва буни ҳисобига вагонларни юк кўтаришидан фойдаланиш анчагина яхшиланади. Металл қириндисини пресслаш, темир – терсакларни майдалаш вагонларга бўлган эҳтиёжларни 2 – 3 маротабага камайтиради. Бундай чора – тадбирларга кўмир ва торф майдаларини брикетлаш ҳам мансуб бўлиб, бунинг натижасида вагонларни юк
кўтаришидан фойдаланиш яхшиланидан ташқари уларни ташиш жараёнида чангланиб учиб кетишидан нобуд бўлишлар камайади.