Reja: 2 soat Karbyuratorli dvigatel ta’minlash tizimining vazifasi, sxemasi, umumiy tuzilishi, ishlashi

Kiritish va chiqarish quvurlari. Har bir dvigatelda, odatda alohida quyilib tayyorlangan ikkita quvur mavjud—kiritish (1) (22-rasm) va chiqarish (5) quvurlari. Kiritish quvurlari karbyuratorni dvigatel kiritish klapanlari tuynuklari bilan tutashtirib, tayyorlangan yonuvchi aralashmani silindrlarga uzatish uchun xizmat qiladi.
Chiqarish quvuri silindrlardan ishlatilgan gazlarni atmosferaga chiqarib yuborish uchun xizmat qiladi. Bir qatorli, klapanlari pastda joylashgan dvigatellarda kiritish va chiqarish quvurlari blokning bir tomonida joylashadi, klapanlari yuqorida joylashgan dvigatellarda esa kiritish va chiqarish quvurlari aksariyat kallak qismiga, bir tomonda ustma-ust qilib o‘rnatiladi. Kiritish quvurlari aluminiy qotishmasidan, chiqarish quvurlari esa cho‘yandan tayyorlanadi.

22-rasm. Kiritish va chiqarish tizimi hamda yonuvchi aralashmani isitish elementlari: a-kiritish va chiqarish quvurlari (GAZ-3102); b va d-zaslonkaning mavsumiy holatlari; e-so'ndirgich; 1-kiritish quvuri; 2-karbyurator о‘rnatiladigan flanes; 3-tormoz yuritmasini vakuum kuchaytirgich naychasi shtutseri uchun teshik; 4-qistirma; 5-chiqarish quvuri; 6-isitishni rostlash sektori; 7-gaykali qayd qiluvchi shpilka; 8-zaslonka; 9 va 14-so‘ndirgich tubi; 10-korpus; 11-pardevor; 12-kamera; 13-ichki quvur; 15-chiqarish quvuri; 16-so‘ndirgich oldingi devorining patrubkalari; 17-so‘ndirgichni qabul qilish quvuri.

V simon dvigatellarda kiritish quvurlari blokning yuqori ayrilish qismida, qo‘sh xonalar oralig‘iga o‘rnatilgan. Bir bo‘linmali yoki ketma-ket ishlaydigan ikki kamerali karbyurator o'rnatilgan dvigatellarda kiritish quvurlari barcha silindrlar uchun umumiydir. Parallel ishlaydigan ikki kamerali karbyurator o‘rnatilgan dvigatellarda esa kiritish quvurlari ikkita kiritish tuynugi bilan ta’minlangan.

Kiritish quvurining korpusida (23-rasm) yonuvchi aralashmasini silindrlarga yuborish uchun ikkita tuynuk bo'lib, ularning har biri karbyuratorning quyi qismi bilan birlashgan. Karbyuratorni o‘rnatish uchun kiritish quvurining yuqori qismida flanes (10), shamollatish tizimining naychasi uchun flanes (7), to‘la oqimli moy filtrini o‘rnatish uchun flanes (1), termostat o‘rnatish uchun flanes (3) mo’ljallangan. Bundan tashqari, moy quyish bo‘g‘zi uchun (2), isitgich krani uchun (6), tormoz yuritmasini vakuum kuchaytirgichi naychasi shtuseri uchun (9) va sovitish suyuqligi harorati uzatgichi uchun (11) teshiklar ko‘zda tutilgan.