Qoraqalpoq davlat universiteti

Hunar – hunardan rizqing unar
O‘zbek xalqi – hunarmand xalq. Qadimgiy Turkiston hunarmandchiligi rivojlangan edi. Me’morchilik, naqqoshlik, duradgorlik, zardo‘zlik, zargarlik kabi sharq hunarmandchiligi butun dunyoga mashhur bo‘lgan. Hozirgi kunda ham O‘zbekistonga kelgan sayyohlar eng avvalo ana shu xalq amaliy san’ati namunalari bilan tanishadilar. Ular hunarmandlarimiz o‘z qo‘llari bilan yasagan noyob buyumlarni xarid qilib olib ketadilar. Qadimiy obidalarimizdagi o‘ymakorlik, ganjkorlik san’ati namunalarini hayrat bilan tomosha qiladilar. Insonning hunari qancha ko‘p bo‘lsa hayotda o‘z o‘rnini topishi shuncha oson bo‘ladi. Hayotida ko‘p insonlar turmush mashaqqatlarini tez bartaraf qiladilar. Ular o‘zlari uchun ham, qarindosh-urug‘lari, qo‘ni-qo‘shnilari uchun ham – barchaga va jamiyatga katta foyda keltiradilar, obro‘ e’tiborga ega bo‘ladilar. Shuning uchun xalqimizda “Hunar – insonning ziynati” degan naql bor. Derlar: “Hunar kishiga ziynatdir, hunarsiz kishi quruq savlatdir”.
Daraxt shoxi mevasiz bo‘lsa kiyikning shoxlaridan nima farqi bor? Inson ham hunarsiz, qo‘lidan biror ish kelmasa, ya’ni yaratmasa boshqa jonzotlardan qanday farqi bor? Qalam garchi cho‘p bo‘lsa-da, ilm-u hunarni yuzaga chiqargani uchun azizdir.

4-mashq.Maqollarni o‘qing, yod oling. Mazmunini sharhlang.

Mehnat — hayot tomiridagi qon.
Bugungi mehnat — ertangi rohat.
Mehnatni hurmatlasak, u bizni e’zozlaydi.
Inson mehnat bilan ulug‘lanadi.
Baxtning kaliti mehnatning cho‘ntagida.
Bog‘-u bo‘stonlar — mehnat mahsuli.
Gul uzishdan oldin gulzor yaratadilar.
Mehnat odamni hayot qiyinchiliklaridan qutqaradi.
Yalqovlik bor yerda ko‘z bo‘yash bor.
Yumshoq paxta qattiq mehnatning mahsulidir.
Mashaqqatning mahsuli farog‘atdir.
Odam mehnatini yoysa, mehnati uning shuhratini yoyadi.
Odam bahosizdir, ammo uni mehnati baholaydi.
Mehnat — yo‘qchilikning kushandasi.
Mehnat orom berib uxlatadi, kamchilik esa chimchilab uyg‘otadi.
Mehnatning ko‘zini topgan, rohatning o‘zini topadi.
Mehnat — hayot ziynati.