Qarshi davlat universiteti zologiya va fi ziologiya kafedrasi zoogeografiya fanidan

Boreo–Atlantika zoogeografik oblasti. Boreo–Atlantika zoogeografik oblasti Arktikaning janubini va Atlantika okeanining shimoliy qismini egallaydi. Bu oblast fiziko-geografik xususiyatlari bilan ko`p jihatdan Boreo–Patsefika oblastiga o`xshaydi, ammo oblastning shimoliy va janubiy qismida suvning yuzasidagi harorat orasidagi farq katta emas. Mazkur oblastda absolyut chuqurliklar kam, ba`zi kam suvli dengizlarida suvning sho`rlanish darajasi past (Baltika dengizi). Inson faoliyati ko`pgina qirg`oq hayvonlarining yashash muhitlariga kuchli ta`sir ko`rsatgan va barcha ov qilinadigan ob`ektlarda inson faoliyati bevosita namoyon bo`ladi.
Umuman oblast faunasi tarkibida xilma-xillik past darajada namoyon bo`ladi. Ko`pgina turlar zichlik darajasining pastligi bevosita inson faoliyatining natijasidir.
Oblastda endemik sut emizuvchilardan biskay kiti, oq biqinli delfin va uzun tumshuqli tyulenlar uchraydi. Afalina delfinlarining qora dengiz va atlantika kenja turlari xarakterli turlardan sanaladi. Oblastning shimoliy g`arbi va Arktikaga chegaradosh qismi uchun grenlandiya tyuleni doimiy odatdagi tur sanaladi. Bu oblastda quloqli tyulenlar va morjlar uchramaydi.
Qushlardan klusha baliqchisi, dengiz baliqchisi, gagarka, glupish va kichik bo`ron qushi tarqalgan. Baliqlardan treskasimonlar va seldsimonlarning bir necha turlari (merluza,atlantika treskasi, atlantika seldi, baltika seldi yoki salaka va boshqalar) uchraydi. Endemik turlarga dengiz minogasi, piksha va atlantika baqrasi misol bo`ladi.
Boreo–Patsifika oblastiga qaraganda, Boreo–Atlantika oblastida uchrovchi qisqichbaqasimonlar, mollyuskalar va ninatanlilar faunasining turlar soni sezilarli darajada kam, biomassasi esa kam. Qayd etilgan har ikkala oblastning shimoliy yarim shardagi mo``tadil mintaqasida taksonomik jihatdan yaqin va hatto bir turga mansub bo`lgan ko`pgina hayvonlar uchraydi. Masalan, okean seldi har ikkala boreal oblastda ham o`zaro yaqin kenja turlarni, ya`ni atlantika seldi va tinch okeani seldi kabi kenja turlarni hosil qiladi. Hayvonlarning bunday tarqalishi amfiboriallik deb yuritiladi.