Qarshi davlat universiteti zologiya va fi ziologiya kafedrasi zoogeografiya fanidan

Boreo–Patsifika yoki Shimoliy-Tinch okeani zoogeografik oblasti. Mazkur zoogeografik oblast Tinch okeanining shimoliy qismini va Bering bo`g`ozidan shimolda joylashgan dengizlarni o`z tarkibiga oladi.
Boreo-Patsifika zoogeografik oblastida suv yuzasidagi harorat Arktika oblastiga nisbatan yuqori va u yil mavsumlariga qarab kuchli tebranib turadi. Qishda akvatoriyaning asosiy qismida suzib yuruvchi muzliklar paydo bo`ladi, yozda esa suvning yuza va chuqur qatlamlaridagi harorat farqi yaqqol seziladi. Oblast tarkibiga kiruvchi barcha havzalarda tuz tarkibi okean bilan bir xil. Havzalarning asosiy qismida suv chuqurligi ancha yuqori, qirg`oq mintaqasi esa ancha keng maydonni egallaydi.
Mazkur oblastda sut emizuvchilardan kalan yoki dengiz qunduzi, ko`k va seldsimon kitlar, tishli kitlardan shimol plavuni, qisqaboshli delfin, dengiz cho`chqachasi, kurak oyoqlilardan quloqli tyulen, dengiz mushugi, haqiqiy tyulen va yo`l-yo`l tyulen uchraydi. Endemiklarga dengiz qunduzi, quloqli tyulen, dengiz mushugi, dengiz cho`chqachasi va qisqa boshli delfinlar kiradi.
Boreo–Patsifika oblastining ornitofaunasi tarkibida Arktikaga xos qushlarning ba`zi turlari bilan bir qatorda, ipatka, boltatumshuq, oynakli chistik, moyevka, qoradumli baliqchi, kochurka va boshqalar uchraydi. Ularning deyarli barchasi oblast uchun endemiklardir.
Bu yerdagi xarakterli baliq turlariga lasossimonlarga mansub bo`lgan oltita endemik tur (keta, gorbusha, nerka, chavicha va boshqalar) tegishli. Xuddi shunday tinch okeani seldi, serdina ivasi, bir necha turdagi kambalalar ham oblast uchun xarakterli baliq turlaridan sanaladi.
Qisqichbaqasimonlardan kamchatka krabi va boshqa juda ko`p qisqichbaqasimonlar endemiklardir. Ikki qopqoqli mollyuskalar, ninatanlilar, ko`p tukli chuvalchanglar va bulutlar faunasi biomassasi va xilma-xilligi bo`yicha ustun turadi. Arktikadan Boreo–Patsefika oblastiga kitsimonlarning ayrim turlari kirib kelsa, aksincha Boreo–Patsefika oblastidan Arktikaga ayrim chistiksimon qushlar o`tib turadi. Har ikkala oblastda mayka baliqchi qushi va uzoq sharq navaga balig`i keng tarqalgan. Oblastning janubida davriy ravishda Tinch okeanining tropik qismiga xos fauna elementlari uchrab turadi.
Mazkur zoogeografik oblastga tegishli havzalarning qirg`oqlari inson tomonidan yaxshi o`zlashtirib olingan. Qirg`oq mintaqalarida baliq va boshqa dengiz hayvonlarini yetishtirish hamda ovlash yo`lga qo`yilgan. Uzoq sharq seldlari, lasossimon baliqlar, kambala, quloqli tyulenlar, bir necha turdagi kitlar va dengiz qunduzlari asosiy ovlanadigan turlardir. Intensiv ov qilish mazkur turlar sonining kamayishiga sabab bo`lmoqda. Ayni paytda mazkur zoogeografik oblast hayvonlarini muhofaza qilishga qaratilgan xalqaro va regional chora-tadbirlar rejalari ishlab chiqilgan.