Qarshi davlat universiteti iqtisodiyot kafedrasi davlat boshqaruvida inson resurslari

Davlat xizmati tushunchasining asosiy belgilari:
1.Davlat xizmatining davlat organlarida amalga oshirilishi. Davlat organi – bu davlat mexanizmining bir boʻlagi hisoblangan va davlat-hokimiyat vakolati doirasida davlat vazifa va funksiyalarini amalga oshiradigan davlat tashkiloti.
Davlat tashkiloti keng qamrovli tushuncha boʻlib, uning tarkibiga davlat organi bilan bir vaqtda, davlat muassasasi va davlat korxonasi ham kiradi. Lekin, davlat organi oʻzining funksional xususiyatiga koʻra davlat muassasasi va davlat korxonasidan farqlanadi.
Davlat muassasasi ma’lum bir sohada xizmat koʻrsatish (masalan, ta’lim berish, sogʻliqni saqlash, kredit berish) faoliyati bilan, davlat korxonasi esa, ishlab chiqarish faoliyati bilan, bir moddiy boyliklarni yaratish bilan shugʻullanadi.
2. Davlat xizmatining professional (kasbiy) faoliyatda ifodalanganligi. Davlat xizmatida boʻlgan shaxs uchun asosiy faoliyat yoʻnalishi, albatta bu davlat xizmatidir. Davlat xizmatchisi qonun hujjatlarida belgilangan tartibda boshqa mehnat faoliyatini ham amalga oshirishi mumkin (masalan, pedagogik, ilmiy faoliyat). Lekin xizmat munosabatlari ular uchun hamma vaqt birinchi darajali hisoblanadi.
Davlat xizmatida professionallik nafaqat bir faoliyat doirasida harakat qilishni, balki mazkur sohada tegishli bilim va malakalarni ham talab etadi. Odatda, davlat xizmatida boʻlish yoki davlat xizmatida ma’lum bir mansabni egallash uchun oliy yoki oʻrta-maxsus ta’limga, ma’lum bir faoliyat sohasida tegishli ish tajribasiga (stajga) ega boʻlish talab etiladi.
3. Davlat xizmatchilarining hokimiyat vakolatiga ega boʻlishi. Davlat xizmatida boʻlgan shaxslarning qaysi biri davlat xizmatchisi maqomiga ega ekanligini aynan hokimiyat vakolati belgilab beradi. Hokimiyat vakolatining mavjudligiga qarab shaxsni davlat xizmatchisi sifatida koʻrsatib oʻtish mumkin.
Davlat xizmatchilarining hokimiyat vakolati doirasi turlicha boʻladi hamda shu belgiga qarab davlat xizmatchilari bir-biridan farqlanadi (tasniflanadi). Davlat xizmatchilari davlat vazifalari va funksiyalarini hokimiyat vakolati doirasidan kelib chiqqan holda amalga oshiradi.
Davlat hokimiyat vakolati davlat nomidan ommaviy manfaatlarni koʻzlab boshqaruv qarorlarini qabul qilish, ularning ijro etilishini ta’minlash, ijrosi ustidan nazoratni amalga oshirish hamda uni muhofaza qilish bilan bogʻliqdir.