Пешоб лаборатор таҳлиллари, буйрак патологиясида биохимик текширувларнинг клиник интерпретацияси

Лейкоцитлар
Лейкоцитлар - рангсиз юмалоқ шаклдаги, ўзгармаган эритроцитдан 1,5-2,0 марта катта ҳужайралар. Сийдикда одатда нейтрофиллар бўлади. рНи 5-7га тенг ва солиштирма оғирлиги 1,015 -1.030 г/мп бўлганда, бу кулранг, майда донадор, юмалоқ, диаметри бўйича эритроцитдан 1.5 марта катта ҳужайралардир. Сийдикнинг паст солиштирма оғирлиги (1.002 -1,008 г/мл) ва ишқорий ёки кескин ишқорий реакциясида (pH 8,0 - 9,0) нейтрофиллар ўлчамлари катталашади, шишади, цитоплазмасида микроскоп катта катталаштиришида сегментланган ядролари кўринади ва нейтрофил гранулаларининг броун ҳаракати кузатилиши мумкин. Бактериялар сақлаган сийдикда узоқ вақт бўлганда нейтрофиллар парчаланади. Эозинофиллар ўлчамлари нейтрофиллар каби, лекин улардан цитоплазмасида бир хил ўлчамдаги характерли донадорлилик бўлиши, сферик шакли, сарғимтир - яшил ранги, нурни кескин синдириши билан фарқланади. Ҳужайра ўлчами ва цитоплазмасида эозинофил донадорликни жойлашиш зичлиги сийдикнинг рНи ва солиштирма оғирлигига боғликдир.
Лимфоцитлар сийдикда фақатгина азур-эозин билан бўялган препаратларда топилади.
Меъёрда 1 мкл сийдик чўкмасида 20 тадан ортиқ лейкоцит бўлмайди, бу Нечипоренко усули билан 2 мл сийдикда 2000 лейкоцитни ташкил этади. Сийдик чўкмасини чамалаб ўрганилганда сийдикнинг эрталабки порциясида микроскопнинг 400х катталаштиришда бир кўрув майдонида лейкоцитлар сони эркакларда - 0-2, аёллар да 0-3 ни ташкил қилади.


Цилиндрлар
Цилиндрлар - оқсил ёки ҳужайрадан ҳосил бўлган цилиндрик шаклдаги, турли катталикдаги ҳосилалар, сийдик чўкмаси сийдик ҳосил қилувчи тизим касалликларида текширилганда аниқланади. Нордон сийдикда улар кўпроқ сақланади, ишқорийда эса тез парчаланади.
Оцсил цилиндрлар дистал каналчаларни тор қисмида, нордон муҳитда (pH 4,5-5,3) сийдикда альбумин, Тамм-Хорсфалл оқсиллари, иммуноглобулинлари бўлганда ҳосил бўлади.
Патологик цилиндрлар ҳосил бўлишига буйракда қон айланишини камайиши, бирламчи сийдикда плазма оқсиллари, электролитлар, Н⁺, миқдорларининг ошиши, интоксикация, ўт кислоталарини пайдо бўлиши, буйрак эпителий ҳужайраларининг зарарланиши, каналчалар сиқилиши ва дилатацияси сабаб бўлади.