Пешоб лаборатор таҳлиллари, буйрак патологиясида биохимик текширувларнинг клиник интерпретацияси

СИЙДИК ЧЎКМАСИНИ ТЕКШИРУВ
Буйраклар ва сийдик чиқариш йўллари касалликлари узоқ вақт ҳеч қандай белгиларсиз кечади. Сийдик таҳлили касалликнинг кардинал белгилари ҳисобланган лейкоцитурия, гематурия ва протеинурияни аниқлаш мақсадида ўтказилиб, бунинг учун клиник ва морфологик таҳлил зарурдир. Сийдикнинг умумий таҳлили мажмуасига сийдикнинг чиқарувчи йўллар буйрак касалликлари билан оғриган беморларда ва бошқа соматик касалликларда ўтказиладиган чўкма шаклли ҳамда кристалл элементларнинг морфологик текширувлари киради.
Сийдик чўкмасини текширув чамаловчи ва миқдорий усуллар билан ўтказилади.
Чамалаш усули сийдикда касаллик белгилари борлиги ҳақида маълумот беради. Миқдорий усуллар эса патологик ўзгаришларни ифодаланганлигини баҳолашга қаратилади ва сийдикнинг эрталабки порциясида ўтказилади
Сийдик чўкмасини тайёрлаш:

1. 
   Центрифуга пробиркасига аралаштирилган сийдикдан 10-12 мл солинади;
   
2. 
   10-15 дақиқа давомида 1500-2000 та айланиш/дақиқа тезликда центрифугаланади.
   
3. 
   Чўкма устидаги сийдик тезлик билан тўкиб ташланади. (пробирка ағдарилади);
   
4. 
   Чўкма пипетка билан аралаштирилади
   
5. 
   Чўкма томчиси буюм ойначаси устига томизилади ва устидан қоплагич ойна билан ёпилади.
   

Микроскопик текширув
Препарат кичик катталаштириш (окуляр 10х ёки бинокуляр 7х ёки 10х объективлар 8х ёки 10х, 20х), сўнг - йирик катталаштиришда (окуляр 10 ёки бинокуляр окулярлари билан, 7х ёки 10х ва 40х объективи билан) кўрилади. Шаклли элементлар (эритроцитлар, лейкоцитлар) бир неча кўриш майдонида микроскопнинг йирик катталаштирганда саналади. Жавоб кўриш майдонидаги ҳужайралар сонига қараб берилади (масалан, 10-15 кўриш май­донида), агар ҳужайралар кам бўлса - 0-2 кўриш майдонида.
Агар ҳужайра элементлари кўп ва кўриш майдонида уларни санаб бўлмаса, ундай ҳолда бланкда лейкоцитлар (эритроцитлар) кўриш майдонини қуюқ қоплаган деб белгиланади.
Цилиндрлар каби шаклли элементлар кам жойлашганида текширувни микроскопнинг кичик катталаштиришида ўтказилади ва уларнинг препаратдаги сони кўрсатилади. (препаратда 2 цилиндр).
Агар цилиндрлар кўп бўлса, уларнинг сони кўриш майдонида, яъни микроскопнинг йирик катталаштиришида белгиланади. Эпителиал ҳужайралар (кўп қаватли ясси, ўтувчи, буйрак эпителийси), кристаллар каби элементлар учун микроскопнинг кичик катталаштиришидан фойдаланиб, “кўп”, “нисбатан кўп”, “кам” миқдорда баҳо бериш кўлланилади.
Муҳим:
Препаратни ҳамма чўкмани буюм ойнасига қуйган ва коплағич ойнаси ёпмаган холда тайёрлаш мумкин эмас, чунки препарат кўп қаватли, турли қалинликда бўлади, бу эса ҳужайра элементларини сон ва сифатини (морфологияси) баҳолашда хатоликка олиб келади хамда оптикани ифлослантиради.
Сийдик чўкмасини текширувнинг миқдорий усули
Сийдик чўкмасини текширувнинг энг кўп таркалган миқдорий усули - бу Нечипоренко усули. Усул принципы - сийдик шаклли элементлари (эритроцитлар, лейкоцитлар ва цилиндрлар) миқдорини ҳисоб камераларида санаш. Миқдорий усуллар яширин яллиғланиш жараёнини ташхислаш, ҳамда буйрак ва сийдик йўллари касалликларини даволаш самарадорлигини баҳолаш учун қўлланилади.