“Педагогика” фанини ўқитиш бўйича ўқув-услубий мажмуа

4. “Тоифалаш” методи талабаларни ўрганилаётган мавзу бўйича муҳим хусусият, жиҳатларни аниқлаш ва уларни ифода этувчи маълумотларни бирлаштиришга ўргатади. Методни қўллаш жараёнида талабаларда мантиқий фикрлаш, муҳим хусусиятларни ёритувчи маълумотларни муайян тизимга келтириш кўникмаларини шакллантиради. Машғулотлар жараёнида ушбу методдан фойдаланиш қуйидаги тартибда амалга оширилади: 1) ўқитувчи муҳим хусусиятлари аниқланиши лозим бўлган мавзу, масала ёки муаммони аниқлашди; 2) талабалар танланган мавзу (масала, муаммо) ҳамда “тоифалаш” методини қўллаш шартлари билан таништириладилар; 3) талабаларга маълум топшириқлар берилади; 4) гуруҳлар топшириқни бажарадилар (мавзу моҳиятини ёритувчи муҳим хусусиятларни аниқлайдилар, уларни жадвал ёрдамида ифодалайдилар); 5) гуруҳлар ўз ечимларини жамоа эътиборига тақдим этади; 6) жамоа томонидан гуруҳларнинг ишлари муҳокама қилинади.
Методдан фойдаланишда талабалар қуйидагиларга эътиборларини қаратадилар: 1. Муҳим хусусиятлар (тоифалар)ни ёритишга нисбатан ягона талаб қўйилмайди. 2. Гуруҳларга бир хил топшириқ берилганда бир гуруҳнинг ечими иккинчи гуруҳнинг ечимидан фарқланиши мумкин. 3. Талабаларга ўқитувчи томонидан мавзу моҳиятини ёритувчи муҳим хусусиятлар ҳақида маълумот бериш мумкин эмас, муҳим хусусиятларни излаш жараёни ҳам уларнинг ўзлари томонидан амалга оширилиши шарт.
11-мавзу: Ўқувчиларнинг юксак маънавий-ахлоқий тарбияси.
Эстетик ва жисмоний тарбия. Оила тарбияси асослари
Машғулот учун материаллар
1. Талабалар учун топшириқ:
Маънавий-ахлоқий тарбия мазмун-моҳияти, асосий тушунчалари, таркибий қисмлари, шакл ва методларига оид саволларга жавоб беринг.
Бу ўринда “Юмалоқланган қор” методи қўлланилиб, талабалар гуруҳларга бирикадилар, ҳар бир гуруҳ аъзолари ўз навбатида жуфтликларга ажраладилар. Талабаларга қуйидаги саволлар берилади:
1. Ахлоқ нима?
2. “Маънавият” тушунчаси қандай маънони англатади?
3. Маънавий-ахлоқий тарбия мақсади нимадан иборат?
4. Маънавий-ахлоқий тарбия мақсади нима?
5. Маънавий-ахлоқий тарбия жараёнида ўқувчиларда қандай сифатлар тарбияланади?
6. Маънавий-ахлоқий тарбия қандай шаклларда ташкил этилади?
7. Маънавий-ахлоқий тарбия методларини кўрсатинг.
8. Қандай воситалар маънавий-ахлоқий тарбияни ташкил этишда самарадор саналади?
9. Маънавий-ахлоқий тарбияни муваффақиятли ташкил этиш учун нималарга эътиборни қаратиш лозим?
10. Маънавий-ахлоқий тарбияни ташкил этишда миллий қадриятлар ҳамда халқ педагогикаси ғояларидан фойдаланишнинг аҳамиятини қандай баҳолайсиз?