“Педагогика” фанини ўқитиш бўйича ўқув-услубий мажмуа

Таълим тизимида давлат ва жамият бошқарувини уйғунлаштириш таълимни ташкил этиш, сифатини ошириш, бунда давлат ва жамиятнинг ҳамкорликка эришишни назарда тутади. Таълим тизимида давлат ва жамият бошқаруви таълим самарадорлигини оширишга замин яратади.


Узлуксиз таълим тизими ва турлари. Ҳар бир ривожланган мамлакат ўз таълим тизимига эга. Таълим тизимининг шаклланиши жамиятнинг ижтимоий-сиёсий, иқтисодий ва маданий ҳаёти билан чамбарчас боғлиқ.

Республика узлуксиз таълим тизими ДТСга мувофиқ таълим дастурларини амалга оширувчи давлат ва нодавлат таълим муассасалари, тадқиқот ишларини бошқарувчи илмий-педагогик муассасалар, таълим соҳасидаги давлат бошқарув органлари ҳамда уларга қарашли корхона, муассаса, ташкилотларни ўз ичига олади.

Узлуксиз таълим бир нечта таълим турларини ўз ичига олади. Яъни: мактабгача таълим, умумий ўрта таълим, ўрта махсус, касб-ҳунар таълими, олий таълим, олий ўқув юртидан кейинги таълим, кадрлар малакасини ошириш ва уларни қайта тайёрлаш, мактабдан ташқари таълим.
Мактабгача таълим боланинг соғлом, ҳар томонлама камол топиб шаклланишини таъминлайди, унда ўқишга интилиш ҳиссини уйғотади, уни мунтазам таълим олишга тайёрлайди ҳамда бола олти-етти ёшга етгунча давлат ва нодавлат мактабгача таълим муасасалари ва оилаларда амалга оширилади. Бу каби таълим муассасаларининг фаолиятини ташкил этишда маҳаллалар, жамоат, хайрия ташкилотлари, халқаро фондлар иштирок этади.
Умумий ўрта таълим тўққиз йиллик мажбурий характердаги умумий (бошланғич ва умумий) ва уч йиллик мажбурий-ихтиёрий характердаги ўрта махсус, касб-ҳунар таълимидан иборат. Ўқиш муддати уч йил бўлган мажбурий-ихтиёрий ўрта махсус, касб-ҳунар таълими узлуксиз таълим тизимининг мустақил тури бўлиб, умумий ўрта таълим негизида ташкил этилади.




АЛ ва КҲКнинг битирувчиларига давлат томонидан тасдиқланган намунадаги диплом берилади. Диплом асосида битирувчилар таълимнинг кейинги босқичларида ўқишни давом эттириш ёки эгалланган ихтисос ва касб-ҳунар бўйича меҳнат фаолияти билан шуғулланиш ҳуқуқига эгадирлар.
Олий таълим ўрта махсус, касб-ҳунар таълими асосида икки босқич (бакалаврият, магистратура)да ташкил этилади, йўналишлари бўйича халқ хўжалигининг турли соҳаларига олий маълумотли мутахассисларни тайёрлайди. Олий таълим муассасаларига талабаларни қабул қилиш давлат грантлари ва пуллик-шартномавий асосда амалга оширилади.