Farmakologiya

XUSUSIY FARMAKOLOGIYA
O‘quv qo‘llanmaning bu bo‘limi farmakologiya fanining
asosiy qismi bo‘lib, unda dori vositalarining guruhlari va ularga
kiruvchi preparatlar, ularning farmakodinamikasi: farmakologik
ta’siri, ta’sir mexanizmi, ishlatilishi, nojo‘ya ta’siri va boshqa
ma’lumotlar bayon etilgan. Dori vositalarini izohlashda qabul
qilingan tasnif (sinflarga bo‘lish) asos qilib olingan.
PERIFERIK NERV TIZIMIGA TA’SIR
ETADIGAN VOSITALAR
Periferik nerv tizimi markaziy  nerv sistemasidan
tashqarida joylashgan nervlardan tashkil topgan bo‘lib, ular
markazdan chiquvchi impulslarni ichki a’zolar, to‘qimalar va
tizimlarga yetkazib beradi. Boshqacha aytganda, markaziy nerv
tizimi shu periferik nervlar orqali ichki a’zolar va tizimlar
faoliyatini boshqaradi. Bular efferent yoki markazdan
qochuvchi nervlar deyiladi. Shu bilan birga markazga intiluvchi
efferent nervlar ham ma’lum. Bular, asosan, analizatorlardan
(eshitish, ko‘rish, hid va ta’m sezish) va sezuvchi nervlar
orqali, to‘qima va a’zolardan impulslarni markazga yetkazib
beradi (sezuvchi nervlar).