Buyrug‘i maktabgacha ta’limga qo‘yiladigan davlat talablarini tasdiqlash haqida

3-§. Sensomotorikani rivojlantirish
85. 6 — 12 oylik bolalarning sezgi organlari yordamida o‘z harakatlarini tartibga solish
qobiliyatiga egaligi ularda sensomotorika rivojlanishining talabi hisoblanadi.
86. Quyidagilar 6 — 12 oylik bolalarda sensomotorika rivojlanishining indikatorlari
hisoblanadi:
bir xil buyum bilan har xil harakatlarni bajarish, jumladan bosish, tashlash, silkitish,
dumalatish, teshiklardan o‘tkazish;
ichi bo‘sh o‘yinchoqlarni bir-biriga solish;
gullarni hidlash uchun engashish;
o‘zi yaxshi ko‘rgan taomni ko‘rganda unga intilish.
87. 6 — 12 oylik bolalar bilan quyidagi mashqlarni o‘tkazish lozim:
turli shakl va rangdagi qopchalarni tayyorlab, ularning ichiga turli narsalar, jumladan
paxta, lattalar, no‘xat, guruch, kofe, makaron kabi narsalarni solish;
bolaga ichi bo‘sh biron o‘yinchoq va tegishli o‘lchamdagi obyekt berish hamda bolaning
ularni bir-biriga solishini rag‘batlantirish;
bolaga atrofidagi gullarga tegishga va ularni hidlashga ruxsat berish;
“issiq” va “sovuq” kabi so‘zlardan foydalanish hamda bolaning ular nima bilan
farqlanishini tushunib olishi uchun ularga tegib ko‘rishiga imkon berish.
88. 6 — 12 oylik bolalarning xavfsiz yashashi va harakatlanishini ta’minlash uchun
o‘yinchoqlarni gigiyena va estetika talablariga muvofiq ravishda tanlab olish lozim.
4-§. Madaniy-gigiyenik ko‘nikmalarni rivojlantirish
89. 6 — 12 oylik bolalar o‘zini parvarishlash va madaniy-gigiyenik ko‘nikmalarni
orttirish qobiliyatiga ega bo‘lishi lozim.

---

90. Quyidagilar 6 — 12 oylik bolalarda madaniy-gigiyenik ko‘nikmalar rivojlanishining
indikatorlari hisoblanadi:
qo‘llarini katta yoshdagilar yordamida yuvish uchun jo‘mrak ostida ushlash, qo‘llarini
sovunlash va bir-biriga ishqalash;
ho‘l gubkani bir qo‘li bilan siqish va suvini siqib tashlash;
ovqatlanish vaqtida qoshiqdan foydalanish;
agar isib ketsa, kiyimlarining bir qismini echib qo‘yish.
91. 6 — 12 oylik bolalar bilan quyidagi mashqlarni o‘tkazish lozim:
bolaning ovqatlanishdan oldin va hojatxonaga kirib chiqqandan keyin qo‘llarini
yuvishini rag‘batlantirish hamda bunga doim amal qilish kerakligini tushuntirish;
bolani jo‘mrakning oldiga olib kelish va unga qo‘llarni qanday yuvish kerakligini
ko‘rsatish;
bolaga sovun berish va undan qanday foydalanish kerakligini ko‘rsatish, bu ishni
bolaning o‘zi mustaqil bajarishini rag‘batlantirish;
bolaning mustaqil ovqatlanishini rag‘batlantirish;
bola isib ketgan bo‘lsa, unga ortiqcha kiyimlarni echib qo‘yish, sovqotayotgan bo‘lsa
issiqroq kiyinib olish uchun ko‘maklashish.
92. 6 — 12 oylik bolalarning xavfsiz yashashi va harakatlanishini ta’minlash maqsadida
quyidagilar taqiqlanadi:
katta yoshdagilarning qarovisiz qoldirish;
o‘tkir qirrali o‘yinchoqlar va buyumlar bilan o‘ynashga ruxsat berish.