O’zbekiston respublikasining soliq kodeksi I bo’lim. Umumiy qoidalar

50-modda. Hisobvaraq-faktura 
Tovarlarni yoki xizmatlarni realizatsiya qilishda yuridik shaxslar va yakka 
tartibdagi tadbirkorlar, agar mazkur moddada boshqacha qoida nazarda tutilmagan 
bo’lsa, ushbu tovarlar yoki xizmatlarni sotib oluvchilarga qat’iy hisobda turuvchi 
hujjati bo’lgan hisobvaraq-fakturani taqdim etishi shart.
Yuridik shaxslar va yakka tartibdagi tadbirkorlar qabul qilingan va berilgan 
hisobvaraq-fakturalarni hisobga olish jurnallarini yuritishi shart.
Hisobvaraq-fakturaning shakli va uni to’ldirish tartibi O’zbekiston 
Respublikasi Moliya vazirligi bilan kelishilgan holda O’zbekiston Respublikasi 
Davlat soliq qo’mitasi tomonidan tasdiqlanadi.
Hisobvaraq-faktura, agar ushbu moddada boshqacha qoida nazarda tutilmagan 
bo’lsa, elektron shaklda rasmiylashtiriladi. Elektron shakldagi hisobvaraq-faktura 
O’zbekiston Respublikasi Moliya vazirligi va O’zbekiston Respublikasi davlat soliq 
qo’mitasi tomonidan belgilangan tartibda elektron hisobvaraq-fakturalar axborot 
tizimida rasmiylashtiriladi. 
Soliq 
to’lovchilar hisobvaraq-fakturani quyidagi hollarda qog’ozda 
rasmiylashtirishga haqli: 
1) O’zbekiston Respublikasining soliq to’lovchi turgan joydagi ma’muriy-
hududiy birliklari chegaralarida umumiy foydalanishdagi telekommunikatsiya 
tarmoqlarining 
mavjud 
emasligi. 
Hududida 
umumiy 
foydalanishdagi 
telekommunikatsiya tarmoqlari mavjud bo’lmagan O’zbekiston Respublikasi 
ma’muriy-hududiy birliklari to’g’risidagi axborot O’zbekiston Respublikasi 
Axborot texnologiyalarini va kommunikatsiyalarini rivojlantirish vazirligining 
rasmiy veb-saytiga joylashtiriladi;

---

44 
2) elektron hisobvaraq-faktura axborot tizimida vakolatli organ tomonidan 
tasdiqlangan texnik xatolar yuzaga kelganligi. Texnik xatolar bartaraf etilganidan 
so’ng qog’oz shaklda yozilgan hisobvaraq-faktura texnik xatolar bartaraf etilgan 
sanadan boshlab besh kun ichida elektron hisobvaraq-fakturalar axborot tizimida 
ro’yxatdan o’tkazilishi lozim. 
Ushbu moddaning birinchi va ettinchi qismlarida nazarda tutilgan qoidalar 
tovarlarni eksport qilish chog’ida qo’llanilmaydi va agar O’zbekiston Respublikasi 
ushbu tovarlarni yoki xizmatlarni realizatsiya qilish joyi deb e’tirof etilmasa, 
tovarlarni yoki xizmatlarni realizatsiya qilishga nisbatan tatbiq etilmaydi. 
Tovarlarni (xizmatlarni) realizatsiya qilish chog’ida agar sotuvchi tomonidan 
xaridorga kassa cheki yoki belgilangan shakldagi boshqa hujjat taqdim etilsa, ushbu 
moddaning birinchi va ikkinchi qismlarida nazarda tutilgan qoidalar qo’llanilmaydi.
Elektr va issiqlik energiyasi, suv, gaz, kommunal xizmatlar, aloqa xizmatlari, 
temir yo’lda tashishlar, transport-ekspeditorlik xizmati, bank operatsiyalari, 
shuningdek tovarlarni (ishlarni, xizmatlarni) uzluksiz etkazib berishni amalga 
oshirayotgan soliq to’lovchilar har oyning oxirgi kunida bir marta hisobvaraq-
faktura yozadi. 
Realizatsiya qilinayotgan tovarlar (xizmatlar) qiymati o’zgarganda, shu 
jumladan etkazib berilgan tovarlar yoki ko’rsatilgan xizmatlar narxi o’zgargan 
yoxud miqdori (hajmi) aniqlashtirilgan hollarda, sotuvchi sotib oluvchiga 
o’zgartirish kiritilgan hisobvaraq-fakturani taqdim etishi shart. 
Ushbu moddaning birinchi qismida nazarda tutilgan hisobvaraq-fakturaning 
mavjud emasligi tovarlarga bo’lgan mulk huquqini o’tkazishni yoki xizmatlar 
ko’rsatishni bu tovarlarni yoki xizmatlarni realizatsiya qilish deb e’tirof etmaslik 
uchun asos bo’lmaydi. 
Tovarlarni (xizmatlarni) etkazib beruvchi tomonidan ushbu kodeksning 269-
moddasida belgilangan hollarda soliq solinadigan bazaga o’sish (pasayish) tarafga 
tuzatish kiritilganda hisobvaraq-faktura rasmiylashtirilib, u tovarlar (xizmatlar) 
oluvchisi tomonidan tasdiqlanadi. 
Hisobvaraq-fakturadagi xatolarni tuzatish, shuningdek taqdim etilgan 
hisobvaraq-fakturaga tovarlar va xizmatlarni etkazib beruvchi va (yoki) oluvchini 
almashtirishga olib kelmaydigan o’zgartirishlar va (yoki) qo’shimchalar kiritish 
zarur bo’lsa, tuzatilgan hisobvaraq-faktura rasmiylashtiriladi. Bu holda ilgari 
rasmiylashtirilgan hisobvaraq-faktura bekor qilinadi.
Ushbu Kodeksning 290-moddasiga muvofiq soliq hisobiga turishi lozim 
bo’lgan xorijiy yuridik shaxslar, ushbu Kodeksning 294-moddasi ikkinchi qismida 
ko’rsatilgan xizmatlarni taqdim etish bo’yicha hisobvaraq-fakturalar, xarid 
reestrlari, sotish reestrlari, ko’rsatilgan xizmatlar bo’yicha qabul qilingan va berilgan 
hisobvaraq-fakturalarni hisobga olish jurnallarini yuritmaydi.