Microsoft Word said ahmad tanlangan asarlar 1-jild ziyouz com doc

www.ziyouz.com кутубхонаси 
128
Аста-секин тонг ёриша бошлади. Кийиниб ташқарига чиққанимда чол паром кетида эшкак 
буриб, дарёнинг қоқ ўртасида нариги қирғоққа қараб кетарди. 
Отни эгарладим. Устига иккита юк машинасини ортган паром ортга қайтди. Чолнинг оппоқ 
соқоллари шамолда силкинар, енглари билагигача шимарилган бақув-ват қўллари эшкакни 
эпчиллик билан бошқариб келарди. 
Туни билан чақин чаққан томондан энди қуёш кўтарилди. Кечаси кумушдек товланган дарё 
суви сарғимтир тусга кирган эди. 
Паромдаги машиналар қирғоққа чиқиб, шағал бости-рилган йўлдан моторларини 
гуриллатиб кетишди. 
— Ота, бир илтимосим бор эди, айтсам, хўп дейсизми? 
— Сўранг, болам. 
Чолни будкага бошлаб кирдим-да, девордаги суратни менга беришини сўрадим. 
— Э, мендан сўраб нима қиласиз, ўзидан сўранг-да. 
— Ўзини беш йилдан бери тополмайман. 
— Мендан сўраб қўя қолмабсиз-да. 
— Танийсизми?! Ҳозир қаерда у?! 
— Қизиқсизми? Ўз қизимдек бўлиб қолган бир кишини танимай жинни бўпманми? Кечаси 
билан Қўшқўнокда чақмоқ чақиб чиққан ўша сиз қидирган Иқбол-да. Бу атрофдагилар кечаси 
шунақа чақмоқ чақиши билан дарров: «Иқбол чироғи ёнди» дейишади, соатингиз неча? Етти 
бўлдими, ҳозир ўзи ишдан қайтиб қолади. Мана шу паромда уйга ўтади. Қани, уйга олиб кетай. 
— Эр қилгани йўқми? — дея шошиб сўрадим ундан. Чол қўл силтади. 
— Назаримда, эрга чиқмоқчи эмасга ўхшайди. Не-не йигитлар киши қўйди. Кўнмайди. 
Хотин-халажнинг гапига қараганда, аллақайси ГЭСда ишлаганда бир йигитга кўнгил берган 
эмиш. Йигит бевафолик қилганмиш, ундай десам, кимни кутади?! Хуллас, бу тўғрида бир нима 
дейиш қийин... 
Чол мендан сўрамай отнинг эгарини олиб сувлуғини бўшатиб қўйди. Мен тўнгакка 
хотиржам ўтириб папирос чека бошладим. 
Дарё ҳамон шовиллар, чол сув ўртасида тўлқинлар билан олишиб, қуёш чиқаётган қирғоққа 
томон интилар эди. 
1956 йил. 

---

Саид Аҳмад. Танланган асарлар. I жилд. Ҳикоялар