Зулмат остонасидаги муҳаббат (2-фасл) “янги ой” Стефани Майер

 https://telegram.me/e_kutubxona

---

69
яхши бошқаришни ўрганиб олгандим, табиийки энди шууримдаги овозни
ҳам кам эшитаман. Айнан шу мени хавотирга соларди. Бор эътиборим ва
ғайратимни ўрмондаги ялангликни топишга қаратдим.
Дам олиш куни яна Жейкобларникига келганимда у менга ўйчан тикилиб
туриб:
― Баъзида ҳаётдан узилиб қолгандек, худди бошқа сайёрада
яшайдигандек туюласан, ― деди у. Мен индамадим.
― Эртага нима қиламиз, сайҳонликни қидирамизми ёки яна мотоцикл
ҳайдаб касалхонага тушамизми?
― Сайр! — дедим мен қатъий. — Назаримда, мен у жойни ўйлаб
топганман... дедим ўйчан, гуллари чаман очилган сайҳонликни топа
олмаётганимиз учун ўзим ҳам иккиланиб қолгандим.
― Топамиз, хавотир олма, — тинчлантирди Жейкоб. — Демак, жума куни
яна ўрмонга борамиз, шундайми?
― Йўқ, жума куни кинога боришим керак. Мактабдаги ўртоқларимга
ваъда бериб қўйганман.
Жейкобнинг юзи ўзгарди. Менинг тикилиб туришимга чидай олмай
ғазабли нигоҳини ерга қадади.
― Сен ҳам борасанми? Ёки юқори синф қизлари даврасида зерикасанми?
― сўрадим тезда гапни ҳазилга буриб.
― Ростдан ҳам дўстларинг билан бирга кинога боришимни истайсанми?
― Ҳа, ― дедим самимий. Сен борсанг, кўнглим бир оз ёзиларди... Бу
гапим билан Жейкоб билан ўртамиздаги чегарани мустаҳкамлаш ўрнига
бузаётганимни сезиб, тилимни тишладим. ― Квилни ҳам чақирсанг,
янада яхши бўлади.
― Ҳа, Квилга бу таклиф жуда ёқади, юқори синф қизлари билан танишиш
унинг жону дили.
Бу мавзуни Майк билан ҳам инглиз тили дарсида муҳокама қилдим.
― Жума куни бўшмисан, Майк?
Унинг ҳаворанг кўзларида умид чақнади.
― Ҳа, бўшман. Бирор жойга бормоқчимисан?
Жавоб беришдан олдин яхшилаб ўйлаб олдим:
― Кўпчилик бўлиб, фильм томоша қилгани борсак дегандим, ― дедим
“кўпчилик” сўзига алоҳида урғу бериб. ― Жуда зўр, даҳшатли кино
кетаётган экан.
― Яхши, — деди у, лекин унчалик қувонмади. — Анжела, Бен, Эрик ва
Кэйтни ҳам таклиф қилсак, нима дейсан?
Назаримда, у жуфт-жуфт бўлиб боришни режалаштиряпти, шекилли.
― Яхшиси ҳаммани таклиф қиламиз, албатта Жессикани ҳам.
― Майли, ― деди Майк кайфияти тушиб.
― Ла-Пушдаги дўстларимни ҳам таклиф қилдим, агар ҳамма борадиган
бўлса, унда сенинг “Шевроле”нгда борамиз.
― Бу ўша доим бирга дарс қиладиган дўстларингми? — деди у бир оз
шубҳаланиб.