П. С. Султонов, Б. П. Ахмедов олий ўқув юртлари учун дарслик

Антропоген омиллар- нишабли ерларда эрозияга қарши етарли чоралар кўрмасдан
фойдаланиш, суғориш ва ёғин-сочин сувларини талаб даражасида бошқара билмаслик,
ерларни қиялик бўйлаб хайдаш, ишлов бериш ва меъёридан ортиқча суғориш, нишобли
ерларга кўп ишлов бериладиган серсув экинларни экиш, тупроқдаги гумус ва бошқа кўплаб
озуқа моддалар миқдорини камайтириб юбориш, ўсимлик қопламини меъёридан ортиқча
йўқотиш, дефляцияга мойил ерларга нотўғри ишлов бериш ва уларни очиқ қолдириш, чорва

---

молларини нотўғри боқиш, турли ҳалқ ҳўжалик бино ва иншоотларини қуришда экологик
талабларга қатъий риоя этмаслик ва бошқалар.
Сув эрозиясининг горизонтал ва бўйлама йўналишда юз берувчи хиллари бор. Эрозия
жараёни нишоблик 0,5-1,0 дан юқори бўлганда рўй бера бошлайди. Горизонтал юза бўйлаб
юз берувчи эрозия деб тупроқни нишобли юзалардан сув таъсирида нисбатан бир хил
тезликда ювилишига айтилади. Бу хилдаги эрозияда тупроқни ювилиши узлуксиз юз бериб
туриши оқибатида ер юзидан катта миқдордаги тупроқ массаси сув билан четга оқиб чиқиб
кетади. Натижада тупроқ секин-аста унумдорлигини йўқотади.
Бўйлама эрозия деб нишоблик ерларда ёғин-сочин ёки суғориш сувларининг торроқ
майдонда кучли оқим вужудга келиши туфайли тупроқни бўйлама(тик) йўналишда
емирилишига айтилади. Бунда кўпинча жарликлар ҳосил бўлади, шунинг учун бу хил
эрозияни жарланиш деб ҳам юритилади. Жарланиш оқибатида йирик яхлит ер майдонлари
бир неча майда бўлакларга бўлиниб кетади. Натижада техникадан фойдаланиш ва бошқа
агротехник тадбирларни амалга ошириш қийинлашади. Жарликлар тупроқ-иқлим ва
антропоген шароитларга қараб йилига 1-3 м. дан 8-25 м. гача баъзан эса ундан ҳам тезроқ
ўсиши мумкин. Илмий манбаъларга қараганда, бир гектар майдондаги жарлик атрофида
камида 2-3 гектар ернинг агроэкологик холати ёмонлашади.
Баъзи маълумотларга кўра, сўнгги 100 йил мобайнида дунё бўйича 2 млрд.гектар ер
эрозия туфайли ишдан чиққан. А+Ш да мавжуд ҳайдалма ерларнинг 110 млн.гектари эрозия
ва дефляцияга чалинган бўлиб, бу умумий майдоннинг 48% ни ташкил этади. Мадагаскар
оролидаги ерларнинг 80%и, Чилининг 72% ерлари эрозияга учраган. Республикамизда барча
тоифадаги ерларни ҳисобга олганда тоғ олди ҳудудларининг 50% ида эрозия содир
бўлмоқда, 22 млн.гектардан ортиқроқ бўлган чул-саҳро ўтлоқларининг қарийб ҳаммаси
дефляция таъсирига дучор бўлган.
Эрозиянинг ирригацион эрозия, яйлов эрозияси, механик эрозия, абразия, саноат
эрозияси каби хиллари хам мавжуд.