O‘zbekiston Respublikasining Iqtisodiy protsessual kodeksi

151-modda. Da’vo arizasiga ilova qilinadigan hujjatlar
Da’vo arizasiga quyidagilarni tasdiqlovchi hujjatlar ilova qilinadi:
1) belgilangan tartibda va miqdorda davlat boji va pochta xarajatlari to‘langanligini;
LexUZ sharhi
Qo‘shimcha ma’lumot uchun qarang: O‘zbekiston Respublikasi Oliy xo‘jalik sudi Plenumining 18.04.2008-yildagi 180-sonli “Iqtisodiy sudlar tomonidan Davlat boji to‘g‘risidagi Qonun hujjatlarini qo‘llashning ayrim masalalari haqida”gi qarorining 4 — 4.6-bandlari.
2) da’vo arizasining ko‘chirma nusxasi va unga ilova qilingan hujjatlar javobgarga va uchinchi shaxslarga yuborilganligini;
3) javobgar bilan nizoni sudgacha hal qilish (talabnoma yuborish) tartibiga rioya etilganligini, agar bu shu toifadagi nizolar uchun qonunda yoki shartnomada nazarda tutilgan bo‘lsa;
4) da’vo talablariga asos bo‘lgan holatlarni;
5) da’vogarning yuridik shaxs yoki yakka tartibdagi tadbirkor sifatida davlat ro‘yxatidan o‘tganligini;
6) da’vo arizasini imzolash vakolatini, agar u vakil tomonidan imzolangan bo‘lsa.
Shartnoma tuzishga majbur etish to‘g‘risidagi da’vo arizasiga shartnoma loyihasi ham ilova qilinadi.
LexUZ sharhi
Qarang: Mazkur Kodeksning 148 — 150, 152 — 155-moddalari.
Oldingi tahrirga qarang.
Investitsiyaviy nizolar bo‘yicha da’vo arizasiga investitsiya shartnomasining ko‘chirma nusxasi, yirik investorning investitsiya faoliyati bilan bog‘liq da’vo arizasiga esa uning yirik investorligini tasdiqlovchi hujjat ham ilova qilinadi.
(151-modda O‘zbekiston Respublikasining 2021-yil 12-yanvardagi O‘RQ-663-sonli Qonuniga asosan uchinchi qism bilan to‘ldirilgan — Qonun hujjatlari ma’lumotlari milliy bazasi, 13.01.2021-y., 03/21/663/0013-son)
152-modda. Da’vo arizasini ish yuritishga qabul qilish to‘g‘risidagi masalani hal etish
Sudya da’vo arizasini ish yuritishga qabul qilish to‘g‘risidagi, qabul qilishni rad etish yoxud qaytarish haqidagi masalani da’vo arizasi sudga kelib tushgan kundan e’tiboran besh kundan kechiktirmay yakka tartibda hal qiladi.
Da’vo arizasini ish yuritishga qabul qilish, qabul qilishni rad etish yoki qaytarish to‘g‘risida ajrim chiqariladi, uning ko‘chirma nusxalari ishda ishtirok etuvchi shaxslarga u chiqarilganidan keyingi kundan kechiktirmasdan yuboriladi.
LexUZ sharhi
Qarang: Mazkur Kodeksning 148 — 151, 153 — 155-moddalari.