O‘zbekisтon respublikasi

Davriy (takroriy) yo‘riqnoma. Bu yo‘riqnomani o‘tkazish vaqtini, korxona kasaba uyushmasi qo‘mitasi bilan kelishgan holda, korxonaning ma’muriyati belgilaydi. Bu yo‘riqnoma ishlab chiqarishning xarakteri va xavflilik darajasiga bog‘liq holda ish joyidagi birlamchi yo‘riqnomadan 3 yoki 6 oy o‘tgach o‘tkazilishi mumkin. Ushbu yo‘riqnoma ishchilarni mehnat muhofazasi va texnika xavfsizligi bo‘yicha bilimlarini oshirish hamda tekshirish maqsadida o‘tkaziladi. Yo‘riqnomani o‘tkazishda ish joyidagi birlamchi yo‘riqnoma dasturi asos qilib olinadi. Mazkur yo‘riqnoma kirish yo‘riqnomasi singari ish staji, malakasi, toifasidan qat’i nazar, hamma ishchilar bilan o‘tkazilishi shart.
Ayrim ishlab chiqarish sohalarida, jumladan qishloq xo‘jalik ishlari mavsumiy xarakterga egaligi sababli, mavsum turiga bog‘liq holda davriy (mavsumiy) yo‘riqnoma o‘tkaziladi. Masalan, kuzgi va bahorgi yerga ishlov berish mavsumi oldidan, ekish mavsumi oldidan, hosilni yig‘ib-terib olish davri oldidan davriy (mavsumiy) yo‘riqnomalar o‘tkaziladi.
Davriy yo‘riqnomadan o‘tganlik to‘g‘risida ma’lumot ish joyidagi birlamchi yo‘riqnomani qayd qilish maxsus jurnaliga kiritilib hujjatlashtiriladi, yo‘riqnomadan o‘tganlar va uni o‘tkazganlar o‘z imzolarini qo‘yishadi.
Rejadan tashqari yo‘riqnoma. Bu yo‘riqnoma texnologik jarayonning o‘zgarishi, yangi mashinalar kiritilishi va yangi materiallardan foydalanish natijasida ish sharoitining o‘zgarishi munosabati bilan ishchilarga mehnat xavfsizligi bo‘yicha kiritilgan yangi talab va qoidalarni o‘rgatish uchun o‘tkaziladi. Bundan tashqari, ishchilar tomonidan xavfli ish usullarining qo‘llanilishi natijasida mehnat intizomi yoki texnika xavfsizlik qoidalari buzilsa
yoki ishchi ishlayotgan joyida biror sabab bilan (masalan, kasallik, ta’til) uzilish ro‘y bersa, shuningdek, ish joylarida kasb kasalliklari va baxtsiz hodisalar ro‘y bersa rejadan tashqari yo‘riqnoma o‘tkaziladi. O‘xshash korxonada halokat yoki biror bir sabab tufayli baxtsiz hodisa ro‘y berganligi haqida xabar olingandan keyin uning sabab va oqibatlari o‘rganilib chiqiladi, xulosa qilinadi, hamda shunga bog‘liq holda, rejadan tashqari yo‘riqnoma o‘tkaziladi.