O‘zbekisтon respublikasi

Mehnat muhofazasini targ‘ibot va tashviqot qilish

Iqtisodiyot obyektlarida mehnat xavfsizligini targ‘ibot qilishdan maqsad odatdagi uslublar va ma’lumotiy vositalar ta’siridan keng foydalanish natijasida yuqori darajada xavfsiz va zararsiz mehnat sharoitini ta’minlash, ishlab chiqarishda sodir bo‘ladigan jarohatlanish va kasallanishlarni yo‘qotish yoki keskin kamaytirishdan iboratdir. Mehnat xavfsizligini targ‘ibot qilish ishlovchilarni xavfsiz va zararsiz mehnat sharoitlarini yaratish usul va uslublari bilan tanishtirish, ularni mehnat va texnika xavfsizligi talab va qoidalariga amal qilgan holda ishlashga chorlashdir [28].

Mehnat xavfsizligi bo‘yicha targ‘ibot ishlari tarmoq rahbarlariga, obyekt rahbarlariga, bosh mutaxassislarga, o‘rta va kichik mutaxassislarga, tarmoq oliy o‘quv yurtlari o‘qituvchilariga va mehnat muhofazasi xizmati mutaxassislari zimmasiga yuklanadi.
Тarg‘ibotning tashkil qiluvchi elementlaridan bittasi qilib ma’lumotlar bazasi shakllantiriladi. Bu bazaga: turli manbalar, tashkiliy shakllar, MХSТ standartlari, kino va videofilmlar, qo‘llanma va ko‘rsatmalar, ko‘rgazmali vositalar, bukletlar, kitobchalar, eslatmalar va boshqa ma’lumotiy va texnikaviy targ‘ibot vositalari kiritiladi.
Ma’lumotiy fond mehnat xavfsizligi bo‘yicha ijtimoiy ma’lumotni tashkil qiladi va ma’lumot tashuvchi vositalarda (kino va magnit lentasida, qog‘ozda, videokassetalarda va boshqalarda) saqlanadi.
Mehnat xavfsizligini targ‘ibot qilish uslublari ishontirish usullari va turlariga tayanadi, bular – tushuntirish, odam ongiga, his qilishiga, hulqiga ta’sir qilish; injenerlik ruhshunosligi metodlarini qo‘llash; ishga yaxshi ko‘nikma hosil qilish maqsadida ularda talab qilinadigan sifatiy ko‘rsatkichlarni shakllantirishdir. Keng tarqalgan targ‘ibot shakllariga quyidagilar kiradi: seminarlarda, ishlab chiqarish yig‘ilishlarida, konferensiyalarda, ma’ruza kechalarida, radio va teleko‘rsatuvlarda ma’ruzalar va chiqishlar qilish; ilg‘or obyektlarga ekskursiyalarga borish; o‘qitish va o‘rgatishning zamonaviy texnik vositalari, metodik qo‘llanmalari va o‘quv qurollari bilan jihozlangan mehnat xavfsizligi bo‘yicha kabinetlar va burchaklarni tashkil qilishdir.