O‘zbekisтon respublikasi

MMMK fanining maqsadi va vazifalari. Ilm va fanning, texnika va texnologiyaning hozirgi taraqqiyoti darajasida ishlab chiqarishda to‘la zararsiz va xavfsiz mehnat sharoitini amalda yaratishning imkoniyati mavjud emas. Shu sababli mehnatni muhofaza qilishning vazifasi zararli va xavfli ishlab chiqarish omillarining ishlovchilarga ta’sirini eng kam darajaga keltirishga imkon beradigan
chora-tadbirlarni ishlab chiqishdan, ishchilar shikastlanishining oldini olishdan, yuqori mehnat unumdorligi va sifatiga erishishga yordam beradigan qulay ish sharoitlarni yaratishdan iboratdir.
Barcha ishlab chiqarish korxonalarida, shu jumladan suv va qishloq xo‘jaligi sohasi korxonalarida ham, to‘la-to‘kis sanitariya-gigiyena sharoitlarini ta’minlash, og‘ir qo‘l kuchi bilan bajariladigan mehnatni bartaraf qilish, ya’ni zamonaviy texnika va texnologiyalarni ishlab chiqarishda qo‘llash, kasb kasalliklarini butunlay yo‘qotish chora-tadbirlarini amalga oshirish kerak bo‘ladi.
MMMK fanining maqsadi ishlab chiqarishda xavfsiz va sog‘lom ish sharoitlarini yaratish uchun mutaxassislarni nazariy va amaliy jihatdan tayyorlash, texnologik jarayonlarda, mashina va mexanizmlarda avariyalar sodir bo‘lganda ishchi va xizmatchilarni to‘g‘ri harakat qilish va himoyalanishga o‘rgatishdir.
MMMK fani o‘z maqsadiga erishish uchun quyidagi asosiy masalalarni yechishni talabalarga o‘rgatish vazifalarini belgilagan:

• 
  ishlab chiqarishdagi xavf-xatarlarni identifikatsiyalash, ya’ni ularning sonli xarakteristikalarini va tavsiflarini aniqlash;
  
• 
  xavfli va zararli ishlab chiqarish omillarining yuzaga kelishining oldini olish prinsiplari, uslublari va vositalarini tahlil qilish;
  
• 
  mehnatning xavfsiz sharoitlarini tashkil qilish uslublarini bilish;
  
• 
  mehnat xavfsizligi sharoitlarini insonning fiziologik va psixologik holati ko‘rsatkichlariga bog‘liq holda tahlil qilish va tadbirlar ishlab chiqish;
  
• 
  mehnat xavfsizligi bo‘yicha asosiy me’yoriy-huquqiy hujjatlarni bilish, o‘rganish va amalda qo‘llay bilish;
  
• 
  mehnat xavfsizligi sharoitlarini yaratishda mansabdor shaxslarning vazifalari va javobgarliklarini;
  
• 
  ishlab chiqarishdagi jarohatlanish va kasb kasalliklarini tahlil qilish uslublarini;
  
• 
  ishlab chiqarishdagi jarohatlanishlar va kasb kasalliklarining iqtisodiy oqibatlarini tahlil qilish uslublarini;
  
• 
  zararsiz ish sharoitini ta’minlovchi umumiy va shaxsiy himoya qilish vositalari va uslublarini;
  
• 
  mashina va mexanizmlarda, texnologik jarayonlarda qo‘llaniladigan xavfsizlikni ta’minlash vositalarining tuzilishi va ishlashini;
  
• 
  turli mashina va mexanizmlarni, elektr qurilmalarini ishlatganda, texnik xizmat ko‘rsatganda va ta’mirlashda ko‘riladigan asosiy texnika xavfsizligi talablarini.
  

MMMK faniga o‘qitish talabalarning umumta’lim va maxsus fanlardan olgan bilimi, malakasi, saviyasi, ko‘nikmasi va tajribasini hisobga olgan holda amalga oshiriladi.