O’zbekiston respublikasi oliy va o`rta maxsus ta’lim vazirligi nizomiy nomidagi toshkent davlat pedagogika universiteti boshlang’ich ta’lim fakulteti boshlang’ich ta’lim pedagogikasi kafedrasi boshlang’ich ta’limda pedagogik diagnostika

Har bir ko’rsatkich darajasida o’quvchilarning tarbiyalanganlik mezonlari:
1-3-sinflar
Vatanparvarlik: jonajon o’lkaning o’tmishi va hozirgi hayotiga qiziqish, tabiatga mehr qo’yish va uni ehtiyotlash; o’z maktabini sevish.
O’rtoqlik: jamoaviy mashg’ulotlarda, o’yinlarda ishtirok etish; o’z quvonchlari, boshidan kechirganlarini tengdoshlari baham ko’rishga intilish, o’rtog’idan ta’magir bo’lmasdan yordam berishga tayyor turish, o’z sinfining sha’niga dog’ tushirmaslikka intilish.
Kattalarga hurmat: xushmuomalilik, itoatgo’y bo’lish, o’qituvchiga, ota-onalarga, katta yoshli kishilarga qo’lidan kelgancha yordam ko’rsatish.
Saxiylik: mehribon, kichkintoylarga g’amxo’r bo’lish; o’z o’rtoqlaridan o’yinchoqlarini, kitoblarini va shunga o’xshash narsalarini ayamaslikka tayyor bo’lish, jonivorlarga mehr bilan qarash.
Halollik: samimiylik, rostgo’ylik, o’zgalarning narsasini ularning ruxsatisiz olmaslikni odat qilish; ayb ish qilganda ixtiyoriy tan olish; bergan va’dalarini bajarishga o’rganish.
Mehnatsevarlik: vijdonan o’qish; uy-ro’zg’or ishlari yuzasidan o’ziga yuklatilgan yumushlarni sidqidildan bajarish; jamoaviy ravishda o’z-o’ziga xizmat ko’rsatiladigan ishlarda, ijtimoiy-foydali mehnatda faol ishtirok etish; mehnat darsi mashg’ulotlariga qiziqish bilan qatnashish.
Tejamkorlik: o’zini tashqi ko’rinishini ozoda tutish; o’z shaxsiy buyumlarini tartibli saqlash; maktab mulkini ehtiyot qilish.
Intizomlilik: aytilgan ishni albatta bajarishga o’rganish; maktabda, ko’chada. Uyda, jamoat joylarida belgilangan odob-axloq qoidalariga rioya qilish; sinf jamoasini talablarini bajarish.
Odobli bo’lish: o’quv mashg’ulotlariga muntazam qatnashish; darslarda diqqat-e’tibor bilan o’tirish hamda puxta bilim olishga intilish; uyga vazifalarni muntazam va ixtiyoriy ravishda bajarish.
Qiziquvchanlik: barcha noma’lum, yangi narsalarga qiziqish bilan qarash; tevarak-atrofdagi kishilarga savollar bilan bilan murojaat qilish; o’qishga, mutoalaga havas qo’yish; darslardan yaxshi o’zlashtirish.
Go’zallikni sevish: badiiy havaskorlik to’garaklarida aktiv ishtirok etish; san’at bo’yicha o’tkaziladigan mashg’ulotlarga qiziqish bilan qatnashish; go’zallikni his qilish qobiliyatini o’stirish, har bir ishni chiroyli bajarishga intilish.
Kuchli, chaqqon, chiniqqan kishi bo’lishga intilish; kun tartibi va shaxsiy gigiyena qoidalariga amal qilish, ertalabki badantarbiya mashqlarini bajarish; jismoniy tarbiya mashg’ulotlariga qiziqish bilan qatnashish; sport o’yinlarida faol ishtirok etish.