O’zbekiston respublikasi oliy va o’rta maxsus ta’lim vazirligi namangan davlat universiteti udk magistratura bo’limi boshlang’ich ta’lim metodikasi kafedrasi

BIRINCHI BOB YUZASIDAN XULOSA
Innovatsion yondashuvga asoslanagan zamonaviy ta’limga xos muhim jihatlardan biri – pedagog faoliyatining innovatsion harakter kasb etishiga erishish sanaladi. Innovatsion pedagogik faoliyatni amalga oshirish uchun o’qituvchiga zarur bo’lgan xususiyatlar sifatida pedagogik tadqiqotlarda: motivatsiya va innovatsion jarayon haqida bilimlarga ega bo’lish; pedagogik harakatlarni loyihalash ko’nikmasi; pedagogik texnologiyalarni faqatgina qo’llay olish emas, balki ularni takomillashtirish ko’nikmasi qayd etilgan.
O’qishga o’rgatishda ta’limni individuallashtirish – uni har bir o’quvchining o’z individual xususiyatlariga moslab tashkil etish demakdir. O’quv-tarbiya jarayonini individuallashtirish yo’li bilan bu jarayondagi turli to’siqlar bolaning uyatchanligi, o’qituvchi bilan o’quvchining bir-birini anglamasligi, o’quv materialining murakkabligi va shu kabi muammolar bartaraf etiladi.
Har bir fan o’zining o’rganish ob’ekti va predmetiga ega bo’lganidek, hozirgi kunda boshlang’ich sinflarda o’qish metodikasi adabiy ta’lim metodikasi sifatida ish ko’rishi lozimligi g’oyasi ilgari surilmoqda. Haqiqatan ham, adabiyot o’qitish sistematik kursiga tayyorlovchi predmet sifatida o’qish metodikasi bolalar adabiyoti namunalari asosida o’z maqsad va vazifalarini belgilaydi. Shundan kelib chiqqan holda boshlang’ich sinfda o’qish darslarining o’rganish ob’yekti – o’quvchilarning adabiy ta’limni egallash jarayoni deb belgilanishi maqsadga muvofiqdir.
Hozirgi adabiy ta’limni o’qitishda maktab oldiga o’sib kelayotgan yosh avlodni real hayotga tayyorlash, ongli ravishda kasb tanlashiga erishish, o’quvchilarni atrofdagi kishilar bilan madaniyatli muomala qilishga o’rgatish talabi qo’yilmoqda. Buning uchun o’quvchilarning imkoniyatlarini va asosiy faoliyatlarini hisobga olgan holda o’qitishning har bir bosqichida maktab adabiy ta’limi tayanch maqsadlarni belgilab olish lozim. Ushbu vazifani bajarishda boshlang’ich sinf o’qituvchilaridan innovatsion faoliyatni samarali amalga oshirishni talab etadi.