O`zbekiston respublikasi maktabgachata’lim vazirligi maktabgacha ta’lim tashkilotlari rahbar va mutaxasisslarini qayta tayyorlash va ularning malakasini oshirish instituti

I BOB. MAMLAKATIMIZDA MAKTABGACHA TA’LIM TIZIMIGA OID ISTIQBOLLI ISLOHOTLARNING SAMARADORLIGI

1. 
   O‘zbekiston Respublikasining maktabgacha ta’lim sohasidagi islohotlar
   

Biz uchun birinchi o‘rinda bolalarimizning ma’naviyati,

bilimi, sog‘ligi. Shuning uchun davlat tomonidan

maktabgacha ta’limga katta e’tibor berilmoqda va bu hali boshlanishi. Sizlarning vazifangiz bolalarning

ko‘zidagi nurni ilg‘ab olish, ularga yaxshi tarbiya berish.[24]

Shavkat Miromonovich Mirziyoyev

Jamiyat taraqqiyotida o‘sib kelayotgan yosh avlodning jismoniy va ma’naviy barkamolligi, ta’lim-tarbiya sohasi vakillarining mas’ulligi ham muhim o‘rin tutadi. Bu jihatning maqsadga muvofiqligi shu jamiyatning har tomonlama ravnaqini belgilovchi o‘zak nuqta sanaladi. Ushbu ijtimoiy-tabiiy qonuniyat insoniyat tarixining hamma davrlarida ham dolzarb o‘rinni egallab kelgan. Ayniqsa, hozirgi globallashgan axborot-texnika asrida yanada muhim bosqichga ko‘tarilgan. Buni mamlakatimizda kechayotgan jadal sur’atdagi islohotlarning tub negizi ta’lim-tarbiya tizimini, metodik ta’minotini takomillashtirish, yosh avlodning ma’nan hamda jismonan sog‘lom rivojlanishini ta’minlash, yuksak intellektga, boy bilim va tajribaga ega mas’uliyatli, fidoyi va talabchan pedagoglarlarni munosib rag‘batlantirish, ularning safini kengaytirish, tajribasidan munosib foydalanish kabi bir qator yo‘nalishlarga borib taqalashi ham yaqqol ifodalab turadi. Bu borada maktabgacha ta’lim sohasi ustuvor mavqeni egallaydi. Zero, inson umri davomida oladigan axborotlarning asosiy qismi maktabgacha ta’lim davriga to‘g‘ri kelishi boisidan, bu davrda bolaning kelajagi, shaxs sifatidagi takomilida tamal vazifasini o‘tovchi muhim va munosib ma’lumotlarni taqdim qilib borish ijtimoiy-pedagogik zaruratdir.

Umuman, har qanday jamiyat taraqqiyotida uning kelajagini ta’minlaydigan yosh avlodning sog‘lom va barkamol bo‘lib voyaga yetishi hal qiluvchi o‘rin tutadi. Shu sababli biz islohotlarimiz ko‘lami va samarasini yanada oshirishda har tomonlama yetuk, zamonaviy bilim va hunarlarni puxta egallagan, azmu shijoatli, tashabbuskor yoshlarimizga tayanamiz.

O‘zbekiston Respublikasi Prezidenti Sh.M.Mirziyoyev 2020 yil 29-dekabrdagi murojaatnomasida “Biz o‘z oldimizga mamlakatimizda Uchinchi Renessans poydevorini barpo etishdek ulug‘ maqsadni qo‘ygan ekanmiz, buning uchun yangi Xorazmiylar, Beruniylar, Ibn Sinolar, Ulug‘beklar, Navoiy va Boburlarni tarbiyalab beradigan muhit va sharoitlarni yaratishimiz kerak. Bunda, avvalo, ta’lim va tarbiyani rivojlantirish, sog‘lom turmush tarzini qaror toptirish, ilm-fan va innovatsiyalarni taraqqiy ettirish milliy g‘oyamizning asosiy ustunlari bo‘lib xizmat qilishi lozim”, - deydi.[10]

Ushbu maqsad yo‘lida yoshlarimiz o‘z oldiga katta marralarni qo‘yib, ularga erishishlari uchun keng imkoniyatlar yaratish va har tomonlama ko‘mak berish – barchamiz uchun eng ustuvor vazifa bo‘lishi zarur. Shundagina farzandlarimiz xalqimizning asriy orzu-umidlarini ro‘yobga chiqaradigan buyuk va qudratli kuchga aylanadi.

Shu maqsadda “Yangi O‘zbekiston – maktab ostonasidan, ta’lim-tarbiya tizimidan boshlanadi”, degan g‘oya asosida keng ko‘lamli islohotlarni amalga oshiramiz.