O’zbekiston respublikasi jismoniy tarbiya va sport vazirligi o’zbekiston davlat jismoniy tarbiya va sport universiteti eshkak eshish nazariyasi va uslubiyati chirchiq-2020 yil

Eshishni bajarish texnikasi. Eshkak eshuvchi eshishni boshlashdan oldin dastlabki holatni qabul qiladi. Bunda gavda taxminan bir yelka oldinga 40-50° ga buriladi, biroz oldinga egiladi. Tortuvchi qo’l bo’shashgan va oldinga cho’zilgan. Panja iyakdan sal pastroqda, kil chizig’i va qayiq borti o’rtasida. Itaruvchi qo’l tirsak bo’g’imidan bukilib yuqoriga ko’tarilgan va orqada shunday joylashganki, panja ko’z darajasida, tirsak esa yelka darajasida joylashadi. Eshkak panja bilan erkin ushlanadi (18-rasm).

18-rasm. Eshkak eshuvchining eshishga tayyorgarligi
Baydarkada eshkak eshishda harakatning to’liq sikli ikkita tayanch va ikkita tayanchsiz davrni o’z ichiga oladi. O’z o’rnida tayanch davr shartli ravishda fazalarga bo’linadi.
Suvni ilish (olib o’tishning boshlanishi) – tortuvchi qo’l oldinga-to’g’riga cho’ziladi. Eshkak eshuvchi gavdasi vertikal o’q atrofida aylanadi. Qo’l va gavdaning bir vaqtda harakatlanishi bilan vertikal yassilikda eshkak yuzasi suvga tiqiladi.
Suvni ilishni bajarishga asosiy talab – eshkak yuzasini suvga tayanishini hosil qilishdir. Bunga eshkak yuzasini suvga tekkazishdan oldin havodagi harakati va suvni ilishda to’g’ri burchak berish orqali erishiladi.
Olib o’tish – qo’l va gavdaning hamohang ishlashi orqali bajariladi. Eshkak eshuvchi gavdasi vertikal o’q atrofida aylanadi. Qo’llar gavda bilan bir vaqtda harakatlanadi.
Itaruvchi qo’l tirsakdan bukilib eshkakni oldinga itaradi, bu orqali eshkak yuzasining suvga mustahkam tayanishiga erishiladi. Tortuvchi qo’l olib o’tish boshida cho’zilgan holda qoladi va gavda burilishi natijasida yuzaga kelgan kuchlanishni eshkakka o’tkazadi. Olib o’tishning ikkinchi yarmida tortuvchi qo’l tirsak bo’g’imidan bukiladi. Bu orqali eshkak yuzasining suvga doimiy tayanishiga erishiladi. Qo’lning tirsak bo’g’imidan bukilish kengligi eshkak eshuvchining tana tuzilishidan (gavda va qo’l uzunligidan) kelib chiqadi, uning qayiqda o’tirish balandligi va eshkakni ushlash kengligiga bog’liq.
Itaruvchi qo’l oldinga to’liq cho’zilishi va uning panjasi iyak darajasiga kelishi hamda tortuvchi qo’l gavda to’g’risiga bo’lishi bilan olib o’tish yakunlanadi.