O‘zbekiston respublikasi adliya vazirligi toshkent davlat yuridik Universiteti Jinoyat-protsessual huquqi darslik

Shu holatda jinoyat-protsessual qonun talablari buzilganmi? Bu tergov harakati natijasida olingan dalillarning maqbullik darajasini aniqlab, vaziyatga huquqiy baho bering.

VII BOB. DALILLARINI TO‘PLASH USULLARI

(muallif – yuridik fanlar doktori, dotsent D.Mirazov)


Annotatsiya: mazkur mavzuni o‘quvchilar tomonidan o‘zlashtirilishi jinoyat ishlari bo‘yicha ish yurituvni amalga oshirish jarayonida dalillarni to‘plashning usullari bo‘lgan tergov va sud harakatlarining tushunchasi, turlari, shakllari, ularni o‘tkazishning asoslari va protsessual tartibi, ularni o‘tkazishda ishtirok etuvchi shaxslar, natijalari bo‘yicha tuziladigan protsessual hujjatlarning shakli va mazmuniga oid xususiyatlarini bevosita o‘rganib, tergov va sud harakatlarini o‘tkazish va rasmiylashtirishga yo‘naltirilgan bilimlarni olish va zaruriy ko‘nikmalar shakllantirish imkonini beradi.

7.1. Dalillarni to‘plash usullari tushunchasi va turlari

Dalillarni to‘plash usullari jinoyat protsessining dolzarb masalalaridan biri bo‘lib, u jinoyatlarni tez va to‘la ochish va aybdorlarni fosh etish maqsadiga erishishda asosiy vositalar vazifasini bajaradi.
Dalillarni to‘plashning usullari JPK normalari bilan aniq va batafsil tartibga solingan.
Jinoyat ishini yuritishga vakolatli davlat organlari va mansabdor shaxslar tomonidan jinoyat-protsessual qonunchilik talablariga muvofiq amalga oshiriladigan, jinoyat ishining holatlarini aniqlash uchun ahamiyatga ega faktik ma’lumotlarni topish, tekshirish va qayd etishga qaratilgan protsessual harakatlar tergov harakatlari deyiladi. Tergov harakatlarining doirasi Jinoyat-protsessual kodeksi 87-moddasi birinchi qismida keltirilgan dalil to‘plash usullari bilan belgilanadi. Tergov harakatlarini quyidagi ko‘rsatkichlari: tergov harakatining nomi, ushbu tergov harakati JPKning qaysi moddasi bilan tartibga solinganligi, uni o‘tkazish uchun sud yoki prokurorning ruxsati kerakligi, uni o‘tkazishda xolislarning ishtirok etishi, tergov harakati bayonnomasi tuzilishi bo‘yicha tasniflanadi.