O‘zbekiston respublikasi adliya vazirligi toshkent davlat yuridik Universiteti Jinoyat-protsessual huquqi darslik

Apellyatsiya instansiyasida ishlarni koʻrib chiqish tartibi: ish yuritishning asosiy mohiyati va xususiyati. Umumiy qoidaga koʻra, apellyatsiya instansiyasi sifatida muayyan ma’muriy-hududiy birlikda mavjud boʻlgan yuqori sud sanaladi.
JPKning 483-moddasi apellyatsiya instansiyasi sudi jinoyat ishini oʻn besh sutkadan kechiktirmay koʻrib chiqishga kirishishi lozimligini belgilaydi.
Apellyatsiya instansiyasi sudi ishni sud majlisida koʻrishga tayyorlash paytida quyidagilarni tekshirishi shart:
– mahkum (oqlangan shaxs)ga, jabrlanuvchiga birinchi instansiya sudi qarorlari nusxasining topshirilganligini;
– protsess ishtirokchilariga apellyatsiya shikoyati (protesti), shuningdek qoʻshimcha materiallar kelib tushganligi toʻgʻrisida xabar berilganligini;
– apellyatsiya shikoyati (protesti) bilan protsess ishtirokchilari tanishtirilganligi hamda ularga ushbu hujjatlar nusxasi topshirilganligini;
– protsess ishtirokchilarining apellyatsiya instansiyasida ish koʻriladigan joy va vaqt toʻgʻrisida tegishli tarzda xabardor etilganligi, shuningdek mahkum (oqlangan shaxs), uning himoyachisi va qonuniy vakillariga, jabrlanuvchi, fuqaroviy da’vogar, fuqaroviy javobgar va ularning vakillariga apellyatsiya instansiyasi sudi majlisida ishtirok etish huquqining tushuntirilganligini.
Apellyatsiya instansiyasi sudining qarori ajrim shaklida qabul qilinadi.

28.3. Jinoyat protsessida kassatsiya tartibida ish yuritish

Kassatsiya tartibida ish yuritishning tushunchasi va ahamiyati. Kassatsiya tartibida ish yuritish bosqichida faqat apellyatsiya tartibida koʻrilmagan, qonuniy kuchga kirgan hukm (qaror, ajrimlar)lar koʻriladi. Apellyatsiya tartibida koʻrilgan ish kassatsiya tartibida koʻrilmaydi. Kassatsiya tartibida ish yuritishni qoʻzgʻatish faqat muayyan shaxsga nisbatan apellyatsiya tartibida ish koʻrilmagan boʻlsa yoʻl qoʻyiladi.
Shu bois shikoyat (protest)ni qabul qilishda birinchi instansiyasi sudi quyidagilarni tekshirishi lozim: kassatsiya shikoyati (protesti) bergan shaxsning vakolatini hamda shikoyat (protest)da manfaatlari e’tiborga olingan shaxsga nisbatan apellyatsiya instansiyasi sudining qarori mavjud emasligini.