O‘zbekiston respublikasi adliya vazirligi toshkent davlat yuridik Universiteti Jinoyat-protsessual huquqi darslik

Kassatsiya instansiyasi vakolatlari. Sud ishni kassatsiya tartibida koʻrib chiqib, oʻz ajrimi bilan:
1) birinchi instansiya sudining hukmini oʻzgarishsiz, shikoyatni yoki protestni esa qanoatlantirishsiz qoldirishga;
2) birinchi instansiya sudining ayblov hukmini bekor qilishga va oqlov hukmi chiqarishga;
3) birinchi instansiya sudining oqlov hukmini bekor qilishga va ayblov hukmi chiqarishga;
4) birinchi instansiya sudining ayblov hukmini bekor qilishga va ishni tugatishga;
5) birinchi instansiya sudining hukmini oʻzgartirishga, shu jumladan, ayblov hajmini, jinoyat tavsifini oʻzgartirishga, jazoni yengillashtirishga yoki kuchaytirishga, xuddi shuningdek ogʻirroq jinoyat toʻgʻrisidagi qonunni qoʻllashga haqli.
Agar birinchi instansiya sudi ish yuzasidan kamchiliklarga yoki sud tergovini bir tomonlama olib borishga yoxud protsessual qoidabuzarliklarga yoʻl qoʻygan boʻlsa, kassatsiya instansiyasi sudi ishni birinchi instansiya sudiga yangidan sudda koʻrib chiqishga yubormay, kamchiliklarni toʻldirish, protsessual qoidabuzarliklarni bartaraf etish choralarini koʻradi hamda koʻrib chiqish natijalarini inobatga olgan holda tegishli qaror qabul qiladi.

28.4. Nazorat tartibida ish yuritish va yangi ochilgan holatlar munosabati bilan ish yuritishni qaytadan boshlash

Nazorat tartibida ish yuritish jinoyat protsessining alohida bosqichi bo‘lib, mazkur jarayonda yuqori turuvchi sud ish yuzasidan qonun bilan vakolat berilgan sud raisi (uning o‘rinbosari) yoxud prokurorning (uning o‘rinbosari) protestiga asosan birinchi instansiya sudi tomonidan chiqarilgan, apellyatsiya yoki kassatsiya tartibida ko‘rib chiqilgan birinchi instansiya sudining hukmi va ajrimlarining, yuqori instansiya sudlarining ajrim (qaror)larining qonuniy, asosli va adolatliligi tekshiriladi.

Nazorat tartibida ish yuritishning asosiy vazifasi qonuniy kuchga kirgan, apellyatsiya yoki kassatsiya tartibida koʻrib chiqilgan sud qarorlarida mavjud boʻlgan xatolarni tuzatish, sudlanganning huquq va manfaatlarini himoya qilish, shu bilan birga, jabrlanuvchining manfaatlarini ta’minlash, tergov va sud amaliyotini toʻgʻri yoʻnaltirishdir.