O‘zbekiston respublikasi adliya vazirligi toshkent davlat yuridik Universiteti Jinoyat-protsessual huquqi darslik

27.3. Hukm chiqarish vaqtida sud tomonidan hal qilinadigan masalalar

Hukm chiqarish vaqtida sud hal qiladigan masalalar majmui JPKning 457-moddasida belgilangan. Ushbu masalalarni quyidagicha asoslarga koʻra tasniflashimiz mumkin:

• 
  jinoiy qilmish haqidagi masalalar: sudlanuvchi aybli deb topilayotgan qilmish haqiqatan sodir etilganmi; bu qilmish jinoyat deb hisoblanadimi va u JKning qaysi moddasida nazarda tutilgan;
  
• 
  sudlanuvchining aybi haqidagi masalalar: bu qilmishni sudlanuvchi sodir etganmi; sudlanuvchi jinoyat sodir etilishida ayblimi va, basharti aybli boʻlsa, uning aybi qanday shaklda;
  
• 
  sudlanuvchining javobgarlik darajasi va maqomi haqidagi masalalar: sudlanuvchining javobgarligini yengillashtiradigan va ogʻirlashtiradigan holatlar bormi; sudlanuvchi sodir etgan jinoyati uchun jazolanishi kerakmi; sudlanuvchiga qanday jazo tayinlanishi lozim va u shu jazoni oʻtashi kerakmi; sudlanuvchini JKning 34-moddasiga muvofiq oʻta xavfli retsidivist deb topish lozimmi;
  
• 
  jazoni ijro etish sharoitlari haqidagi masalalar: ozodlikdan mahrum qilingan mahkum jazoni qanday tartibli koloniyada oʻtashi lozim va jazo muddatining bir qismini turmada oʻtashi kerakmi;
  
• 
  fuqaroviy da’vo va ashyoviy dalillar taqdiriga oid masalalar: fuqaroviy da’vo qanoatlantirilishi kerakmi, bu da’vo kimning foydasiga va qancha miqdorda qanoatlantirilishi lozim, shuningdek fuqaroviy da’vo qoʻzgʻatilmagan boʻlsa, jinoyat tufayli keltirilgan mulkiy zarar undirilishi kerakmi, sudlanuvchilar sheriklik yoki hissadorlik tartibida javobgarlikka tortilishlari lozimmi; fuqaroviy da’voni ta’minlash uchun xatlangan mol-mulkni nima qilish kerak; ashyoviy dalillarni nima qilish kerak;
  
• 
  sud xarajatlariga oid masalalar: protsess chiqimlarini kimning zimmasiga va qancha miqdorda yuklash kerak;
  
• 
  sudlanuvchiga nisbatan majburlov choralarini tayinlash haqidagi masalalar: ehtiyot chorasi haqidagi masalalar: sudlanuvchiga nisbatan ehtiyot chorasini tanlash, ilgarigisini qoldirish, oʻzgartirish yoki bekor qilish kerakmi; sudlanuvchiga nisbatan tibbiy yoʻsindagi majburlov choralarini qoʻllash yoxud uning ustidan homiylik belgilash zarurmi; sudlanuvchiga nisbatan lavozimidan chetlashtirish tarzidagi protsessual majburlov chorasini bekor qilish kerakmi.