O‘zbek tili va adabiyoti

Kolofon – kotibning qo‘lyozma so‘nggida keltiradigan ma’lumotnomasi. Unda kotib nomi, qo‘lyozmaning ko‘chirish sanasi va kotib mulohazalari beriladi.
Poygir – o‘zidan keyingi sahifaning shu so‘z bilan boshlanishini bildirub keluvchi so‘z bo‘lib, o‘ng sahifaning eng ostiga, chap tomonga joylashtiriladi. Poygir sahifalar ketma-ketligini belgilash uchun bet raqamlari o‘rniga ishlatiladi.
Asosiy matn tuzish usuli – matnshunoslik tadqiqi usullaridan kompleks foydalanib, matnning muallif variantiga yaqin ko‘rinishini tuzish.
Hoshiya – jadvalga olingan matnning tashqarisida izoh berish, parallel ravishda boshqa bir asar matnini joylashtirish, matnda belgi qo‘yilgan o‘rinlarni tafsiloti bilan yoritish, ilovalar berish.
Qurama matn – Turli qo‘lyozma nusxalardagi matniy tafovutlarning birma-bir almashtirilib borilishi asosida yuzaga kelgan matn. Bu jarayonda aniq nusxa tanlanmaydi. Bunday matn rus matnshunosligida XVIII – XIX asrlarda qo‘llanilgan.
Adabiy hodisaning fundamental tadqiqi – o‘zaro bog‘liq uchta jihatdan, ijodkor konsepsiyasi, manba yo‘nalishi va matn aniqligi kabi masalalarni kompleks o‘rganishdan iborat.
Manbaning kompleks tadqiqi – har bir adabiy hodisani ijodkor konsepsiyasi, manba yo‘nalishi va matn aniqligi kabi masalalar mushtarakligida fundamental asosda o‘rganish.
Maoniy – kalom(gap)ning hol talabiga mosligi haqidagi ilm.
Sarf – so‘zning o‘zgarishi haqidagi ilm (morfologiya)
«Armug‘oni Xislat» –Mulla Sayyid Haybatulloh Xo‘ja Xislat tomonidan tuzilgan bu bayozda Miskin Toshkandiy, Akmalxon, Zokiriy, Pirimqori Andijoniy, Saryomiy kabi 30 ga yaqin shoirning asarlari berilgan. Kitobga Sirojiddin Maxdum Sidqiy Xondayliqiy kotiblik qilgan. Majmua Toshkentdagi G‘.Orifjonov matbaasida hijriy 1329 (melodiy 1911) yilda chop qilingan. 
Bayoz – lug‘aviy ma’nosi “oqlik” bo‘lib, atama sifatida “she’rlar to‘plami”ni anglatadi. Bayozlar odatda ikki yoki undan ortiq shoirlar she’rlaridan tashkil topadi.
Bayoz tarkibi – sarbayoz (so‘z boshi), lirik she’rlar (asosiy qism), xotima va ilovadan tashkil topadi. Ayrim bayozlarda asarlari kiritilgan shoirlar nomi mundarija sifatida beriladi. Bu xil to‘plamlar mualliflarning o‘zi yoki adabiyot ixlosmandlari va xattotlar tomonidan tuziladi.