O’quv-uslubiy majmuaning tarkibi

Fosfororganik moddalar bilan zaharlanish va ularda birinchi yordam.

Fosfororganik moddalar yuqori darajali zaharli ta’sirga ega bo’lib, nerv sistemasiga tanlab ta’sir ko’rsatish xususiyatiga ega. Bularga tabun, zarin, zoman, V- gazlar kiradi. Kuchsizroq ta’sirga ega bo’lgan fosfor organik moddalar (metafos, tiofos, xlorofos) kemiruvchilar bilan kurashda qo’llaniladi. Biroq ularni ehtiyotsiz ishlatishda ularning changidan, teri va shilliq pardalarga tushishidan zaharlanish yuzaga kelishi mumkin. Bunday zaharlanishlarning klinik belgilari nerv-paralitik moddalar bilan zaharlanishga o’xshab, xuddi shunday davolanishga muhtoj bo’ladi.Hamma ZM lar suyuq holatida ham, bug’ holatida ham kuchli zahar bo’lib hisoblanadi. Lipoidlarda yaxshi eriganligi tufayli bu ZM lar teri orqali so’rilib, kuchli rezorbtiv ta’sir ko’rsatadi, terida hech qanday o’zgarishlar chaqirmaydi. Zaharlanish belgilarining rivojlanish tezligi ZM ning kirish yo’llariga bog’liq(teri va shilliq pardalar, nafas a’zolari, oshqozon-ichak trakti).

FOZ lar nafas yo’llari orqali kirganda zararlanishning ob’ektiv belgilari ko’z qorachiqlarining torayishi(mioz) va bronxlar muskullari ning spazmidir.

ZM lar teri va oshqozon-ichak trakti orqali kirganda mioz va bronxlar spazmi namoyon bo’lmaydi, lekin so’lak bezlarining va bronxlardagi bezlar faoliyatini zo’rayishi zararlanishdan dalolat beradi.

FOZ larning nafas yo’llari orqali kirganda so’lak oqishining tezlashishi, tumov, ko’krak qafasidagi og’irlik hissi, bronxoreya va bronxospazmning belgisi bo’lmish nafas chiqarishdagi xirillashlar kuzatiladi.

Teri zararlanganda shikastlangan sohaning terlashi va shu sohadagi mushaklarning tirishishi mahalliy belgi bo’lib hisoblanadi. Umumiy belgilar mahalliy belgilardan so’ng 10-30 daqiqa keyin paydo bo’ladi.

Ovqat hazm qilish trakti orqali zararlanganda oshqozon sohasida og’riq, ko’ngil aynash, qayd qilish, noixtiyoriy ich kelishi va siyib yuborish kabi belgilar namoyon bo’ladi.

Klinik belgilariga qarab, og’irlik darajalariga qarab, engil, o’rtacha og’irlikdagi va og’ir darajalari farqlanadi.

Engil formadagi zaharlanish bosh og’riqlari, qo’rquv hissi, harakat bezovtaligi, engil mioz, nafas chiqarishning qiyinlashuvi bilan o’tadigan bronxospazm, burundan ko’p miqdorda keladigan shiiliq bilan o’tadigan tumov, balg’amli yo’tal, ko’krakda og’riq, yorug’likdan qo’rqish, akkomodatsiyaning buzilishi, qo’zg’aluvchanlik, uyquning buzilish bilan xarakterlanadi. Bu belgilar 1-2 sutka davomida kuzatiladi. Ko’pincha engil darajadagi zaharlanishda to’liq tuzalish yuz beradi.

O’rtacha og’irlikdagi darajada engil darajadagi belgilarning og’irlashuvi kuzatiladi. Kuchli bosh og’rig’i, bosh aylanishi, qo’rquv hissining kuchayishi rivojlanadi. Akkomodatsiya buzilishi bilan mioz vaqtinchalik bir necha kunga ko’rishning buzilishiga olib keladi. Kuchli ko’z yosh oqishi, so’lak oqishi, tumov, terlash, qorinda kuchli xurujsimon og’riqlar, qayd qilish va ich ketish kuzatiladi.

Xarakat koordinatsiyasi buzilgan. Bronxospazm va bronxoreya bo’g’ilish xurujlariga olib keladi, nafas shovqinli, hushtakli xirillashlar bilan, teri va shilliq pardalari ko’karadi. Shuningdek, yuqoridagi belgilarga qovoq, yuz, til va qo’l- oyoqlarning fibrillyar tortishuvlari, pulsning tezlashishi, arterial qon bosimining ko’tarilishi, siyishning tezlashishi ham qo’shiladi.

Zaharlanishningi og’ir darajasida bosh og’rig’i, qo’rquv hissi, burundan va og’izdan ko’piksimon ajratmalarning kelishi, atrof-muhitda moslashish va nutqning buzilish zo’rayadi. Kuchli bo’g’ilishlar bronxospazm va bronxoreyaning zo’rayishi hisobiga kuchayadi. Gipoksiya markaziy nerv sistemasining faoliyatini buzilishiga va hushning yo’qolishiga olib keladi. Og’ir darajaning eng xarakterli va asosiy belgisi tutqanoqlardir. Tutqanoqlar kloniko-tonik xarakterga ega. Keyin organizmda chuqurroq buzilishlar, falajlar paydo bo’ladi, refleks susayadi, arterial qon bosimi pasayadi, puls yo’qoladi. O’lim holati ko’p hollarda nafas markazining falajlanishi oqibatida yuz beradi.