Ommaviy axborot vositalari

15-modda. Ommaviy axborot vositasini ro‘yxatga olishni rad etish
Ommaviy axborot vositasini ro‘yxatga olish quyidagi hollarda rad etilishi mumkin:
1) ommaviy axborot vositasining maqsad va vazifalari O‘zbekiston Respublikasi Konstitutsiyasiga hamda ushbu Qonunga zid bo‘lsa;
2) bundan avval xuddu shu nomdagi ommaviy axborot vositasi ro‘yxatga olingan bo‘lsa;
3) ariza sudning ommaviy axborot vositasi faoliyatini tugatish to‘g‘risidagi hal qiluv qarori qonuniy kuchga kirganiga bir yil to‘lmay berilgan bo‘lsa;
4) ommaviy axborot vositasi muassisning yoki muassislaridan birining yoxud noshirning manzili O‘zbekiston Respublikasi hududidan tashqarida joylashgan bo‘lsa.
Ommaviy axborot vositasini ro‘yxatga olish rad etilgan taqdirda bunga asos bo‘lgan sabab ko‘rsatilgan holda arizachiga yozma ma’lumot yuboriladi.
16-modda. Ommaviy axborot vositasini chiqarishni yoki nashr etishni tugatish
Ommaviy axborot vositasini chiqarish yoki nashr etish muassisning yoki sudning qarori bilan tugatilishi (yoki to‘xtatilishi) mumkin.
Ommaviy axborot vositasi ommaviy axborot vositalari to‘g‘risidagi qonun hujjatlariga muntazam rioya etmay kelgan taqdirda vakolatli organ ommaviy axborot vositasini tugatish (uning faoliyatini tugatish) haqida sudga murojaat etishga haqli.
(16-moddaning birinchi qismi O‘zbekiston Respublikasining 2002-yil 30-avgustdagi 405–II-son Qonuniga asosan birinchi va ikkinchi qismlar bilan almashtirilgan, — Oliy Majlis Axborotnomasi, 2002-y., 9-son, 165-modda)
Muassis ommaviy axborot vositasini chiqarishni yoki nashr etishni tugatish to‘g‘risidagi qaror qabul qilgan taqdirda muharrir (bosh muharrir) yoki tahririyat xodimi ushbu Qonunning 9-moddasiga muvofiq xuddi shu nomda ommaviy axborot vositasi ta’sis etish masalasini qo‘yishi mumkin. Bunday hollarda ommaviy axborot vositasini qayta ro‘yxatdan o‘tkazish talab etiladi.
17-modda. Ommaviy axborot vositasini ro‘yxatga olishni rad etganlik ustidan shikoyat qilish tartibi
Davlat organi tomonidan ommaviy axborot vositasini ro‘yxatga olishning rad etilishi ustidan ommaviy axborot vositasining muassisi yoki tahririyati sudga shikoyat qilishi mumkin.
(17-modda O‘zbekiston Respublikasining 2002-yil 30-avgustdagi 405–II-son Qonuni tahririda — Oliy Majlis Axborotnomasi, 2002-y., 9-son, 165-modda)