Ommaviy axborot vositalari

11⁴-modda. Muassis huquqlari va majburiyatlarining tugatilishi
Muassisning huquqlari va majburiyatlari quyidagi hollarda tugatiladi:
ommaviy axborot vositasi uchinchi shaxs foydasini ko‘zlab boshqa shaxsga o‘tkazilganda;
muassis — yuridik shaxs bankrotga uchraganda yoki tugatilganda;
O‘zbekiston Respublikasi fuqaroligini yo‘qotganda;
qasddan sodir etgan jinoyati uchun sud hukmi bilan sudlanganda;
vafot etganda.
Muassisning huquqlari va majburiyatlari qonun hujjatlariga muvofiq boshq hollarda ham tugatilishi mumkin.
(11⁴-modda O‘zbekiston Respublikasining 2002-yil 30-avgustdagi 405–II-son Qonuni bilan kiritilgan — Oliy Majlis Axborotnomasi, 2002-y., 9-son, 165-modda)
12-modda. Ommaviy axborot vositalarini ro‘yxatga olish
Tahririyat ro‘yxatdan o‘tkazilganlik to‘g‘risida guvohnoma olinganidan keyin faoliyat boshlashi mumkin.
Ommaviy axborot vositalarini ro‘yxatga olish to‘g‘risidagi ariza O‘zbekiston Respublikasi Hukumati vakolat bergan davlat organiga belgilangan tartibda muassis tomonidan topshiriladi. Arizaga ta’sis hujjatlari ilova qilinadi.


Qarang: O‘zbekiston Respublikasi Vazirlar Mahkamasining 2003-yil 30-sentabrdagi 418-sonli qarori bilan tasdiqlangan O‘zbekiston Respublikasida ommaviy axborot vositalarini ro‘yxatdan o‘tkazish tartibi to‘g‘risidagi nizom.
(12-moddaning ikkinchi xatboshisi O‘zbekiston Respublikasining 2002-yil 30-avgustdagi 405–II-son Qonuni tahririda, — Oliy Majlis Axborotnomasi, 2002-y., 9-son, 165-modda)
Ro‘yxatga olish to‘g‘risidagi ariza topshirilgan kundan boshlab bir oy muddat ichida ko‘rib chiqilishi shart.
Ommaviy axborot vositasini chiqarishga kirishish huquqi guvohnoma olingan kundan boshlab olti oy davomida saqlanib turadi. Belgilangan muddat ichida ommaviy axborot vositasining birorta ham soni (dasturi) e’lon qilinmagan taqdirda ro‘yxatdan o‘tkazilganlik to‘g‘risidagi guvohnoma o‘z kuchini yo‘qotgan deb hisoblanadi.
(12-moddaning to‘rtinchi xatboshisi O‘zbekiston Respublikasining 2002-yil 30-avgustdagi 405–II-son Qonuni tahririda, — Oliy Majlis Axborotnomasi, 2002-y., 9-son, 165-modda)